Olgeš áigu oppalašgova skuvlajávkamis ja dáhttu oahppoministara ásahit nationála registara. Fafo oaivvilda dán šaddat váttisin.
– Mun vuorddán ahte oahppoministtar Tonje Brenna farggamusat čuovvola ávžžuhusa ásahit nationála jávkanregistara. Ii leat mihkke ákkaid vuordit dainna, dadjá Olgeža skuvlapolitihkalaš ságadoalli, ja ovddeš oahppoministtar, Jan Tore Sanner Utdanningsnyttai.
Dán vahkku sáddii son čálalaš jearaldaga Tonje Brennai (Bb).
Oahppodirektoráhta bargogohččuma oktavuođas almmuhii Fafo njukčamánu raportta skuvlajávkama birra. Raporttas leat geahččan dutkamuša mii gávdno dan birra álggahandihte vuođu digaštallamii vejolaš doaibmabijuide.
Fafo dutkit oaivvildit ahte lea váttis cealkit lea go skuvlajávkan dakkár váttisvuohta mii lassána. Sivvan dasa lea unnán dutkan, iešguđetlágan geavaheapmi doahpagiin ja guovtteoaivilvuohta goas skuvlajávkan lea vuorjašuhtti. Sii oaivvildit ahte ferte čohkkejuvvot vuđolet statistihkka ovdal doaibmabijuid sáhttá digaštallat.
– Dutkan maid mii leat čađahan, čájeha ahte sáhttá leat hástaleaddji oažžut dákkár registara, ja oahpaheaddjit dulkojit jávkama iešguđetládje. Dat lea liikká dehálaš oažžut, čállet dutkit raporttas.
© NTB
