-Almmuhus-
OĐĐASAT– Begget earát bissehan daid

– Begget earát bissehan daid

-

-

Ikte eahkes beakkehii Facebookas ahte muhtin olgoriikkalaččat galget leat suoládan muoraid gaskkal Leavnnja ja Kárášjoga. Politiijat eai gávdnan maidege go bissehedje biillaid.

Ikte eahkes almmuhii muhtin nisu gova Facebookii, govas oidnojedje guokte gálvobiilla, nuppis vel goallosvovdna gitta. Goallosvovnna siste oidnojit muorat. Son guhte almmuhii gova čuoččuhii oaidnán biillavuddjiid suoládeamen muoraid geaidnoguoras ja cavgilii olbmuid atnit čalmmis dáid biillaid. Olgoriikkabiillat ledje dalle jođus Skuvvanváre guvlui.

 

Badjel 400 kommentára

Govva bovttii fuomášumi, ja badjel 400 kommentára leat čállon dása. Olbmot miehtá Oarje-Finnmárkku dieđihišgohte gos ain oidne daid biillaid ja deaddiledje maid govaid biillain dađistaga go biila vujii sin meaddel, maiddái politiijaide cavgiluvvui dán birra.

– Mii oaččuimet dieđu diibmu 21.00, ahte navdet suoládan muoraid, dat guhte dieđihii lei ieš vuodjimin biilla maŋis. Mii de vulggiimet ohcat biilla ja gávnnaimet dan diibmu 01.00 ihkku, čilge Oarje-Finnmárkku politiijaguovllu operašunjođiheaddji Lars Jørgen Kleven.

 

Rissiid gávdne

Biila lei jođus Ávanuorrái go politiijat jokse ja bissehedje biilla.

– Biillas eat gávdnan áktánasat maidege eará go sullii 30 rissi iešguđet sturrodagas, nu luittiimet biilla johtui fas. iige das šaddan mihkkege áššiid, čilge Kleven. Biilavuoddjit ledje olgoriikkalaččat.

Dán birra dieđihedje maiddái ihkku jo, ja dat hárbmadii daid geat čuvvo dán gova Facebookas, máŋggas oaivvildit politiijat čurbbet bargan ja menddo hejot ohcan go eai gávdnan muoraid. Maŋimuš govain mat ilbme dán digaštallamii, oaidná ahte goallosvovnna alde leat rissit, muhto dan vuolde ges leat muorat, maid olbmot navdet suolagálvun.

 

– Man bures ohce politiijat daid muoraid?

– Mun gal ferten luohttit iežan bálvváide ja dasa ahte sii barget albma ládje go jo leat vuos vuoddján Hammerfeasttas doarredit dáid biillaid. Sii leat iskan nu bures go sáhtte, vástida Kleven.

 

Gullan earáid bissehan biilla

Muhto operašunjođiheaddji muitala Ávvirii iežas gullan ságaid ahte muhtin oahpis das gii eaiggáda muoraid, galgá leat doarredan biilla, bissehan dan ja váldán muoraid ovdal go politiijat jokse biilla.

– Dát leat dušše spekulašuvnnat, muhto jus leaš duohta de dat dieđusge váikkuha áššái. Dat lea heittot jus dát leaš dáhpáhuvvan nu ahte eai leat midjiide dieđihan, jus livččiimet dákkára gullan de vejolaččat sáhttit ásahit politiijaášši suoládeami ovddas.

 

Dárbbašit cavgilemiid

Kleven lohká Oarje-Finnmárku lea stuorra guovlu gos leat guhkes gaskkat.

– Nu dárbbašit politiijat álbmogis cavgilemiid ja veahkki muhtin áššiin. Jus de muhtin dábálaš olmmoš doarredišgoahtá suollagiid ovdamearkka dihte, de berre midjiide dieđihit dan birra vai diehtit mii dáhpáhuvvá ja sáhttit maid rávvet maid galgá dahkat. Lea buorre go olbmot áŋgiruššet, muhto lea dehálaš midjiide dieđihit, lohká Kleven.

 

– Ii leat ruđa duohken

Kleven duođašta maiddái politiijaid čuvvon digaštallama Facebookas, dan botta go ohce biillaid, dan dattege ii loga gal váikkuhan iežaset mearrádusaide.

– Mii árvvoštallat áššis áššái ahte galgat go vuolgit johtui, eat mii geavat sosiála mediaid foruman árvvoštallan dihte mo galgat hálddašit áššiid. Dán vuoru mearrideimmet vuoddját maŋŋái, muhto dán vuoru ii gártan dás ášši, čilge Kleven.

Go de čájehuvvui ahte biilavuoddjit eai lean fievrredeamen suolagálvvuid, de dat liikká šattai gollun politiijaide.

– In dieđe olu gárttaš máksit, muhto šattaimet liigebálvváid bidjat bargui. Dát dattege lea dakkár beaivválaškriminalitehta, man mii vuoruhat hui sákka. Ii álot leat ruđas sáhka.

-Almmuhus-