Šibitdoaktárat AniCuras, Norgga kennel klubba ja Biebmobearráigeahčču váruhit dál buot beanaeaiggádiid Oslo birrasis. Guovllus lea leavvan okta čiegus njoammudávda. Máŋga beatnaga leat jápmán maŋŋá go lea buohccán.
Dávdda dovdomearkkat leat varraluhča ja/dahje -vuovssanas ja seammás jođánit hedjona.
Dássážii leat unnimus čieža beatnaga jápmán maidda lea njommon dávda, ja máŋga beatnaga leat dál šibitdoaktáriid luhtte dávdadovdomearkkaid dihte.
– Mii eat dieđe lea go virus vai bakteriija mii addá dan dávdda. Iskkadeamit lea dahkkon vai sáhttit diehtit makkár njuommudávda dat lea, dieđihit AniCura sin neahttasiidduin.
Váruhit dávdadovdomearkkaid
Njuommojuvvon beatnagat maid AniCura lea dálkkodan, leat leamaš guovddáš Oslos, muhto bohtet dieđut ahte beatnagat, main leat sullasaš dávdadovdomearkkat, leat maiddái Oslo olggobealde.
– Mii ávžžuhat buot beanaeaiggádiid váruhit lea go sin beana buohccán. Allet váldde beatnagiid párkkaide, beatnateatnamiidda ja stuorra čoahkkebáikkiide.
Máŋga beatnaga, mat leat buohccán ja ožžo dávdadovdomearkkaid, jápme vuollel 24 diimmus.
