-Almmuhus-
KULTUVRABeassi čohkke nuoraid mielde doaimmaide

Beassi čohkke nuoraid mielde doaimmaide

-

-

Luohti árbevirolaš ja ođđaáigge hámis lea fáddán nuoraide bearjadaga Beassi Kulturstašuvnnas.

Bearjadaga diibmu 19-22 lágiduvvo goalmmát eahket mii lea erenoamážit nuoraide – NuorraBeassi Kárášjogas.

 

Luohti

– Bearjadat eahkeda fáddán lean min báikki kulturárbi, namalassi juoigan. Luohti ain eallá sihke árbevirolaš hámis ja maiddái ođđaáigge hámis, omd. eará lávlunšáŋŋeriiguin ja instrumenttaiguin ovttas. Luohti lea Kárášjogas dehálaš kulturárbin. Mii muitalat luođi birra, buktit ovdamearkkaid, hállat das mii luohti lea ja maid dat muitala. Sávvat bures boahtin pizza- ja luohteeahkedii, čállá Beassi Kulturstašuvdna preassadieđáhusas.


Gaskavahku eahkeda lei fáddáeahket sámi rap-artisttain Ailu Valle, Anáris eret, sámegiela birra rap-giellan. Doppe ledje su. 15-16 nuora..

Deaivvadit- ja hutket

– NuorraBeassi-prošeakta lea deaivvadan- ja hutkanbáikin nuoraide gaskal 13 ja 20 jagi ja ulbmiliin lea ovdánahttit doaibmabijuid Kárášjoga gielddas. Nuorat galget oahpásmuvat iežaset gielddain, earret eará daid dáidda-, duodje-, design-, teknihka- ja muđui kreatiivva- ja kulturbirrasiin mat gávdnojit gielddas, muhto main ii dáidde leat leamaš fálaldat nuoraide, muitala Beassi.

Beassi hástala nuoraid boahtit ja ráhkadit joavkkuid dan fáttá hárrái mas beroštit. Sáhttet kurssaid doallat ja lágidit mátkkiid.

Bargojoavkkut maid sáhttet ohcat nuoraidruđaid galledit eará birrasiid Eurohpás.

Beassi lágida dál vuos iešguđet fáddáeahkediid, nuvttá kafeá ja bovdejit nuoraid servvoštallat ja oahpásnuvvat dán fálaldahkii.

-Almmuhus-