Siri Broch Johansen lea okta dan golbmasis olles Norggas geat besset dán masterohppui čakčat.
Norggas lea dušše okta teáhterteakstaoahppu alit dásis, namalassii Oslo dáiddaallaskuvllas masteroahppu. Dán čavčča fállet sii golmma studentii dán teáhterteaksta oahpu. Guovttes Siri Broch Johansen ja Maja Bohne Johnsen boahtiba Davvi-Norggas.
Hålogaland Teateris leat hui duhtavaččat go juste sin teáhteris leaba leamaš gieskat.
– 2013 rájes lea Hålogaland Teater bidjan návccaid bohciidahttit ođđa dramatihka iežaset ArtLabaid bokte, ja mii leat rámis go dát bargu lea buktán bohtosiid, čállet sii preassadieđáhusas.
Čállán olu
Deatnulaš Siri Broch Johansenis lei Artlab bargun “To stemmer” Hålogalándda teahteris diibmá. Dan labas lei fáddán movt giela massin vaháguhtte dovdduid, ja lei čiekŋudeapmi bára sevdnjes beliide. Son lea maid earret eará čállán “Gurut guvlui Heahtás” bihtá man Beaivváš Sámi Našunálateáhter čájehii čakčat ja čállán biografiija Elsa Laula Renberg birra.
Romssas nubbi
Nubbi masterstudeanta lea romsalaš Maja Bohne Johnsen, geas 2013:s lei lab ovttas Ferske Scener vuođđudusain, ja sin manus lei Vestergata. Bohne Johnsen lea freelanceneavttár Romssas gii 2013 maid neavttašii Pippi Langstrømpe Hålogaland Teáhteris. Artlab lea ovttasbargu Dramatikkens hus ja Hålogaland Teateris ja galgá ovddidit ođđa dramatihka, erenoamáš dan mii lea čállon Davvi-Norggas.
