Sámi artista Anja Storelv, gii aitto lávllui Sámi Grand Prixas, lea beassan “Svensktoppen nästa 2015”- oassefinálii Norrbottenis.
Odne almmuhedje makkár lávlagat besset viidáseappot Ruoŧa P4 radiokanála “Svensktoppen nästa 2015”- oassefinálii Norrbottenis.
Sámi artista Anja Storelv (36) lávlla “Niegadit” lea okta dan guđa lávlagis mat leat válljejuvvon dán oassegilvui Norrbottenis.
Baskkimus nállošalbmi
Skánitlaš Anja Storelv, gii dáid beassážiid gilvalii Sámi Grand Prix lávlunoasis, lea orron 13 jagi Ruoŧas. Sutnje lea stuora lávkin beassat dán gilvui, mii lea stuorimus radiogilvu Ruoŧa musihkkamáilmmis.
– Go sáddejin lávlaga dohko, jurddašin ahte lea baskkimus nállošalbmi man čađa lean deaddán iežan musihkka goassege. Lei hui somá danne oažžut dieđu ahte lea válljejuvvon, go dat lea seammás duođaštus ahte musihkka mainna mii bargat, lea doarvái buorre, dadjá Storelv.
Gállok inspirašuvdnan
Anja Storelv lohká “niegadan” lávlaga leat iežas sámi ja etnalaš niegu birra. Seammás lohká leat dan birra movt stáhta geavaha sámi álbmoga.
– Go vuohččan bávkkehii Gálloka ruvkkiin, ja dat vártnuhis dovdu mii de bođii. Mun válljejin de jorgalahttit dan suhtu, ja válljejin baicca dánsut ja lávlut vai buohkat gullet, čilge Storelv gilvolávlaga teavstta birra.
Njuolggosáddagis
Oassefinála sáddejuvvo radios P4 Norrbotten kanálas miessemánu 22. beaivvi, njuolga Studio Acusticumas i Bihtámis. Eai leat vel almmuhan goas olles Ruoŧa radiogilvvut leat, muhto galget leat čakčat muhtumin.