-Almmuhus-
SMÁVVAOĐĐASAT SÁMISBeassá oastit ođđa johka­fatnasiid

Beassá oastit ođđa johka­fatnasiid

-

-

Sámediggeráđđi lea juolludan 134 000 ruvnno doarjjan Sáivu AS:i ja 119 000 ruvnno Mollisjok Lodge AS:i, goappašagat Kárášjoga gielddas.

Sáivu AS lea aitto álggahuvvon fitnodat mii galgá ásahuvvot Iešjávrái. Fitnodaga ulbmil lea guolástit ja bargat biebmobuvttademiin, fállat vásáhusaid, idjadeami ja kulturgaskkusteami. 134 000 ruvdnosaš doarjagiin áigot hukset darfegoađi ja oastit reaidduid.

– Lean ilus go sáhttit doarjut fitnodaga mii áigu fállat miellagiddevaš fálaldagaid meahcceturismmas, idjadeamis ja báikkálaš biepmu ektui. Fitnodaga sajádat duoddaris Finnmárkkus dahká ahte fálaldat lea geasuheaddji kundariidda mat ohcet vásáhusaid gelddolaš guovlluin, dadjá sámediggeráđđi Silje Karine Muotka.

Doarjja johkafatnasiidda

Sámediggeráđđi lea maid juolludan 119 000 ruvdnosaš doarjaga Mollisjok Lodge AS:i, mii lea Vuolit Mollešjoga duottarstobu doaibmafitnodat. Doarjja lea addon oastit guokte johkafatnasa. Fatnasat galget geavahuvvot fitnodaga mátkeealáhusvuoruheami oktavuođas. Fatnasat maid áigot oastit leat árbevirolaš johkafatnasat.

– Dát prošeakta mielddisbuktá ovdáneami ja stuorát kapasitehta dehálaš aktevrrain sámi mátkeealáhusain. Vuolit Mollešjoga duottarstohpu lea fiinna mediaáššiid bokte sihke TV:s ja eará mediain, hui bures gaskkustan eallima duottarstobuin. Dát prošeakta addá Vuolit Mollešjoga duottarstohpui vejolašvuođa vel eanet nannet iežaset fálaldaga, dadjá Muotka.

Doarjagat addojuvvojit Máŋggabealálaš ealáhus ja Sámi mátkeealáhus doarjjaortnegiid bokte, čállá Sámediggi preassadieđáhusas. 

-Almmuhus-