Bearráigehččet ahte nuorain lea oadjebas ja positiiva bargo­vásáhus

Journalista

LO geassepatruljat leat jođus Romssas ja Finnmárkkus, mat bearráigehččet ahte nuorra bargiin leat dat rievttit mat sis galget.

Jahkásaš doaimmain, man LO lágida, lea mihttun ovddidit oadjebas ja buriid bargodili nuorra bargiide miehtá riikka. Geassepatruljat finadit olu bargosajin Romssas ja Finnmárkkus boahttevaš vahkkuid ja sávvet deaivvadit olu nuorra bargiiguin miehtá regiovnna.

Geassepatrulja oaseváldit leat sihke nuorra luohttámušolbmot ja eará áŋgirat fágasearvvis, áigot hupmat nuorra bargiiguin, vástidit sin jearaldagaide, ja fállet ráđiid ja doarjaga sin rivttiid ja geatnegasvuođaid birra bargoeallimis. Daid vahkkuid go geassepatruljat leat aktivitehtas, de geahččalit sii fokuseret earenoamážit nuorra bargiide geat vuosttaš barggus áigot čájehit ahte eai leat okto dilálašvuođas mii sáhttá leat sihke gelddolaš, muhto maid balddihahtti.

– Juohke jagi oaidnit mii daid seamma rihkkumiid bargobiraslágas beare máŋgga bargosajis min regiovnnas. Rihkkunproseanta maŋŋel čađahuvvon patrulja ii njieja, muhto manná baicce nuppe guvlui. Dat lea issoras ovdáneapmi mii čalmmustahttá man dehálaš dát fágalihkadus ja geassepatrulja lea. Min mihttu lea sihkkarastit ahte buot nuorra bargiin leat dieđut sin rivttiid birra ja ahte sis lea oadjebas ja positiiva bargovásáhus, dadjá LO Romssa ja Finnmárkku fágalaš nuoraidčálli, Kirsten Lia, preassadieđáhusas. 

– LO geassepatrulja lea buot deháleamos maid LO bargá Romssas ja Finnmárkku nuoraide, ja dat lea movttegis patrulja mii galgá dahkat áŋgiruššama bargoeallimis sihke bargiide ja bargoaddiide, loahpaha LO Romssa ja Finnmárkkus fágalaš nuoraidčálli, Daniel Andres Ordenes.

Geassepatrulja váldomihtut leat:

Diehtojuohkin: Addit eambbo dihtomielalašvuođa bargoeallima rivttiid ja geatnegasvuođaid birra nuorra bargiide.

Kártet: Identifiseret ja dokumenteret vejolaš rihkkumiid bargobiraslágas.

Doarjut: Rávvet ja doarjut nuorra bargiid geat vásihit hástalusaid bargoeallimis.