Cuoŋománu 24. beaivvi ávžžuha Luondu ja Nuorat streiket ruovttuoahpahusas vuosttaldit politihkkariid doaimmahisvuođa vuostá dálkkádatrahčamušas.
Dieđusge ii šatta čoaggáneapmi olbmuiguin, muhto streikejeaddjit bohtet akšuneret iehčanassii, dahje skihpáriin buori gaskkain.
Šaddá digitála njuolggosátta Luondu ja Nuorat kantuvrras Oslos, apeallain ja konsearttain, boahtá ovdan preassadieđáhusas.
Sii maid ávžžuhit streikejeddjiid oassálastit internationála streaikkas. Dan sáhttá dahkat go geavaha #climatestrikeonline dahje #digitalskolestreik fáddagilkoriid.
Ráhkadan kártta streikejeddjiin
Luondu ja Nuorat leat ásahan kártta gos sáhttá dieđihit iežas streikema. Okta streaika rehkenastojuvvo okta streaikan ovtta báikkis, ovdamearka dihtii sáhttá leat bearaš dahje okta olmmoš.
Bearjadaga sávvet sii ahte leat registrerejuvvon badjel 1000 streaikka, ja dieđihit ahte leat bures jođus. Kártta oainnát dás.
Deháleabbot go ovdal akšuneret
– Cuoŋománu 24. beaivvi áigot nuorat miehtá máilbmi streiket dálkkádaga ovddas. Mii áddet ahte ráđđehus berošta eambbo korona bisseheames dál – muhto dat eai sáhte vajáldahttit ahte luondu ja dálkkádat leaba rašes dásis, dadjá Andreas Randøy, Luondu ja Nuorat 2. várrejođiheaddji.
– Mun jáhkán dál lea deháleabbot go ovdal ahte mii akšuneret, vai muittuhat politihkkáriid ahte leat ain dálkkádatroasus mii áitá otná nuoraid boahtteáiggi, joatká son.
Háliidit ráfáiduhttit davvin Barentsmearas
– Fargga bohtet ráđđehusa evttohusat ahte man guhkás davás sáhttet bohkat oljju ohcamis, digaštallan mii álggii borgemánus diibmá, go Ola Elvestuen guldalii ráđiid nuorain geat dálkkádatstreikejedje, ja álggahii barggu ráfáiduhttit Barentsmeara davvin oljubovremii, dadjá Randøy.
Randøy dadjá ahte buoremus vuohki ráđđehussii čájehit ahte guldalit vuorjašuvvan mánáid ja nuoraid, lea meroštit jiekŋarávdda avádaga ovttas birasfágalaš ráđiin.
