Duorastaga álggii Guovdageainnu valáštallansearvvi jahkásaš juovlabásár. Jođiheaddji sávvá seamma olu olbmuid boahtit go diibmá.
Duorastaga álggii Guovdageainnu valáštallansearvvi jahkásaš juovlabásár. Jođiheaddji sávvá seamma olu olbmuid boahtit go diibmá.
Odne álggii Guovdageainnus juovlabásár. Dat bistá odne, gitta eahkedii, ja lea ihttin maid. Dan lágida Guovdageainnu valáštallansearvi.
(Ášši joatká gova vuolábealde)
Básárjođiheaddji Svein Ole Sandvik árvvoštallá árvvu vuoittuin leat sullii beannot čuođi duháha. Sis leat vuoittut nu go reahka, smart-TV, skeaŋkagoarttat, risku, ja olu eará unnit vuoittut.
Valáštallansearvi lea oastán stuora oasi vuoittuin, ja fitnodagat leat maid searvan vuoittuiguin.
– Leat eanas báikki fitnodagain oastán vuoittuid, muhto TV, iPhone ja iPad leat oastán olggobeale fitnodagain, muitala Sandvik. Son lohká reahkaloattaid vuovdit eanemusat, ja daid jearahit.
Speallis guovdageaidnulaččat
Son sávašii seamma olu olbmuid boahtit go diibmá.
– De lea hui somá bargat go leat olu olbmot básáris. Olbmot liikojit, besset gáfe jugadit ja humadit. Besset loattaid oastit, ja dat lea veahá gelddolaš. Guovdageaidnulaččat leat oainnat veahá «gamblarat», leaikkastallá jođiheaddji.
– Olbmot čoagganit, ii dán áigge šat fina guossis go lea facebook, de besset deike boahtit ja deaivat oahpesolbmuid. Jáhkán jus ii livčče leamaš básár, de livčče juoga váilon.
(Ášši joatká gova vuolábealde)
Son lohká son lea leamaš mielde lágideame bására dan rájes go lei 13 jahkásaš.
– Lean dál 45 jagi leamaš mielde lágideame, muhto ovdal mu áiggi lea maid leamaš básár, muhto in dieđe man áigá leat álgán. Dalle go mun álgen, lei básár plasthállas.
– Dego dološ «plast-hálla»
Go Ávvira journalista finai doaluin, de eai lean vuos nu olu olbmot čoahkkanan, muhto bására jođiheaddji lohká vuordit olu olbmuid.
– Diibmá lei spagga dievva, goappaš beivviid. Dat ii lean leaika, lei dego dološ plasthállas. Diibmá mun ožžon dakkár dovddu, ahte lea dego boares plasthállas, nu olu olmmoš! lohká Sandvik ja muittaša.
Plasthálla lei beakkán feastabáiki, mii lávii seamma šiljus gos Báktehárji dál lea. Son muitala dolin lávii básár measta de go feasta, olbmot čoahkkanedje ja lávejedje jugástallat.
– Dál čoahkkanit doarjut valáštallansearvvi, lohká Svein Ole Sandvik.
Filbmabihtáš juovlabásáras:
