Diimmá garra mihttu dagaha ahte Finnmarksløpet njunuš einnosta kárášjohkalačča Berit Astrid Utsi dán jagáš «underdog» beanavuodjingilvvus «Finnmarksløpet».
Eŋgelas sátni «underdog» mearkkaša dan gean eai jáhke vuoitit, muhto sáhttá hirpmástuhttit buohkaid gilvvus, ja Finnmarksløpet preassa- ja diehtojuohkki. Trond Anton Andersen oaivvilda ahte Utsi lea dat gii sáhttá hirpmástuhttit dán jagi.
– Sus orrot leamen garra plánat, soaitá Sápmi faske ovtta dain viđa buoremus sajiin dán jagi, dadjá Andersen.
Gilvvut
Lávvordaga lea vuolgga Eurohpá guhkimus beanavuodjingilvvus «Finnmarksløpet». Gilvvus leat golbma dási 520 kilomehter (FL-500), 1070 kilomehter (FL-1000) ja 200 kilomehter (FL-junior). Oktiibuot oasálastet 131 beanavuoddji dasa. FL500 luohkás 81 vuoddji, FL1000 luohkás 43 vuoddji ja Juniorluohkás čieža vuoddji.
«Underdog»
Trond Anton Andersen lea einnostan beakkálmasaid ja dán jagáš njunnošiid bohtosiid. Son jáhkká Elisabeth Edland lea FL-500 vuoiti, muhto oaivvilda Vidar Uglebakken, Ole Sigleif Johansen, Vidar Myklebust, Alexander Schwarz, Niklas Rogne ja Sissel Wollmann addit garra gilvvu sutnje.
– Doppe leat máŋga buori vuoddji vel, muhto dáid jáhkán leat hui badjin dán jagi, dadjá Antonsen ja joatká muitaleames ahte doppe lea vel okta gii sáhttá hirpmástuhttit dán jagi.
– Biret Astrid Utsi orru leamen dat gii galgá hirpmástuhttit dán jagi. Son diibmá vujii vuosttas geardde, bođii mollii buriin bohtosiin. Son ii leat nu dovddus, ii hállo ja jurddašuvvo nu su birra. Oaidnit ja gullat ahte son lea hárjehallan bures. Seammás lea sus stuorra ovdamunni, Finnmárkku duottar lea su hárjehallanbáiki, dadjá Andersen.
Garra mihttu
Kárášjohkalaš Berit Astrid Utsi lei diibmá bidjan alcces garra mihtu. Vaikke oasálasttii vuosttaš háve Finnmarksløpet 500 kilomehtera gilvui, de áiggui 20 buoremusa jovkui. Son joavddai mollii 18. sadjái. Son geavahii oktiibuot 59 diimmu ja 42 minuhta olles mátkkis, oktan vuoiŋŋastanáiggiin, ja lei čieža diimmu ja 37 minuhta maŋábealde diimmá vuoiti, Elisabeth Edland. Andersen lohká son vuohttá ahte Utsis orrot dán jagi vel garrasat plánat.
FL-1000 favorihtat
FL-1000 luohkkái son lea bidjan Thomas Wærner, Birgitte Næss, Arnt Ola Skjerve, Petter Jansen, Bernt Walseth ja Ronny Frydenlund, sus lei maid listtus Inger Marie Haaland, muhto son lea geassádan. (Loga sierra ášši). FL-1000 «underdog» namma lea Bjørnar Andersen, guhte lei favorihtta ovddeš áiggi, muhto ii loga diehtit dál albmá birra nu olu.
– Son lei garra vuoddji ovdal, muhto dál diehtit unnán su birra. Mun jáhkán son dat lea gii dán jagi sáhttá hirpmástuhttit, dadjá Antonsen.
Beakkálmasat eai searvva
Nu go lea beaggán de eai gilval «Finnmarksløpet» beakkálmasat dán jagi. Dán rádjái leat beakkálmasat nu go Robert Sørlie, Ralph Johannessen, Lars Monsen ja Sigrid Ekran dieđihan sii eai gilval, ja dál lea vel Haaland geassádan. Antonsen lohká dan vahágin, muhto ii heittohin.
– Dát gilvalit Idarot beatnatgilvvus dán jagi, ja sávvat lihku sidjiide doppe. Vaikke sii eai gilval dán jagi, de ii mearkkaš ahte mis eai leat buorit gilvaleaddjit, go dat eai váillo, dadjá Andersen ja joatká:
– Haaland ii lohkan alddis doarvái buriid beatnagiid, ja son lea okta sis gii ii vuolgge čađaheami dihte, muhto vuoitima, dadjá Andersen.
Gilvu
Juniorluohkás oasálastet čieža gilvaleaddji dán jagi ja Trond A. Andersenas leaba guovttis favorihttan das. Hanna Lyrek ja Ella Kjøsnes. Son oaivvilda soai addiba garra gilvvu nubbi nubbái.
– Šaddá njulgestaga gilvu dán luohkás. Soai leaba hárjánan gilvaleaddjit ja diehtiba bures mas leaba mielde, dadjá Andersen.
