Boazoeaiggát ávžžuha olbmuid veaddit beatnagiiddiset.
Finnmárkku politiijat dieđihit Twitteris ahte Fálás leat šaddan goddit bohcco, go doaivumis lea beana vaháguhttán bohcco. Dat dáhpáhus lei disdaga.
– Boazoeaiggát ávžžuha olbmuid doahttalit veaddingáibádusa go dál lea hearkkes áigi bohccuide, čállet politiijat Twitterii.
Bággu veaddit
Norggas lea bággu atnit beatnaga báttis cuoŋománu 1. beaivvi rájes gitta borgemánu 20. beaivvi rádjái. Dat njuolggadus ii gusto boazodoallobeatnagiidda, sávzabeatnagiidda ja beatnagiidda mat leat politiija-, duollár- ja militearabálvalusas, dahje gádjunbarggus, dieđiha Lovdata láhkagáldu.
