Go nisu ii nagodan dollet beatnagis nu dat gáskkašii eará olbmo, dan ovddas son dubmehalái.
Go nisu ii nagodan dollet beatnagis nu dat gáskkašii eará olbmo, dan ovddas son dubmehalái.
Badjel 30-jahkásaš nisu lea dubmehallan Davvi-Romssa diggegottis máksit 2400 ruvdnosaš sáhku go ribahii iežas beatnaga fallehit ja gáskkašit nuppi olbmo.
Son šaddá maid máksit 2734 ruvdnosaš goluid maid dat nubbi olmmoš šattai gillát go beana gáskkašii rámsun biktasiid ja mátketelefuvnna, ja doavttergoluid ovddas.
Beanaeaiggát maid šaddá 2000 ruvdnosá áššegoluid máksit.
Báttis – liikká fallehii
Ášši lei nu ahte badjelaš 30-jahkásaš nisu lei beatnagiin čuožžume vázzinluotta alde muhtun olbmáin.
Beana lei sus báttis, go nisu bođii vácci dan vázzinluoddaráigge. Go nisu bođii beatnaga buohta, de fallehii beana su.
Beanaeaiggát ii nagodan dollet beatnagis.
Beana njeiddii nissona nu son gahčai gopmut.
Beana gáskkašii nissona rupmaša, ja gieđaid maid go son vikkai várjalit iežas ámadaju.
Beana ii heaitán gáskkašeames ovdal go beanaeaiggát nagodii gaikut eret beatnaga.
Eaiggádis ovddasvástadus
Beanalága párágráfa 4, doppe boahtá ovdan ahte lea beanaeaiggáda ovddasvástádus siharastet ahte beatnaga galgá nagodit doallat nu láhtte albma ládje ja earret eará sihkarastet ahte dat ii njuike eará olbmuid ala.
Diggi cealká duomus ahte dát beanaeaiggát ii lean doarvái várrogas go válddii beatnagastis mielde báikái gos ledje eará olbmot.
Davvi-Tromssa diggegoddi čállet duomus ahte vaikke lei beana báttis, de ii leat beanaeaiggádis leamaš doarvái kontrolla go ribáhii beatnaga nissona ala ja gaskašii su
. Lea go leamaš loaččobáttiid čuožžume dainna beatnagiin, dahje ii nagodan dollet go beana njuikii nissona ala, de ii leat son doarvái várrogas leamaš.
Olmmoš borán
Diggi cealká maid ahte go dat beana lea guovtte háve ovdal gáskestan eará olbmo ja vaikke lea diehtán ahte beana sáhttá leat olmmošborán, de ii leat doarvái várrogas dainna leamaš olbmuid siste.
Dat beana, mii lea dakkar seahkálaš beana mas veahá vel rottweiler varrá maid, lea oktii ovdal gáskestan ovtta virgeolbmá nu das šadde hávit juolgái.
Dan oktavuođas lea Tromssa politiijaguovlu gohččon su várrogas leat beatnagiin olbmuid siste.
Son, gii gáskahalái, ja okta vihttán čilgiiga dikkis ahte beana lea dovddus báikkis dan dáfus ahte lea olmmošborán. Beana eaiggát ii boahtán diggái ieš.
