Norga lea okta dain riikkain máilmmis gos jápmet eanemus olbmot liikeborasdávdii. Borasdávdasearvi (kreftforening) ja eamidielkosearvi(Melanomforening) ballet ahte koronapandemiija dahká dilálašvuođa vel eambbo dramáhtalažžan.
Eamidielkoborasdávda lea dađibahábut dábálamos borasdávdašládja Norggas. Maŋimuš logi jagis lea lohku lassánan measta 10.000 olbmuin. Sivvan dasa lea go olbmot leat eanet olgun beaivegoardagis, mátkkoštit dávjjibut lieggasut guovlluin, geavahit koansta beaivváža ja olusiin lea liiki mii ii gierdda áfi. Lea vejolaš eastadit eamidielkoborasdávdda ja lea álki dálkkodit jus dan fuomáša árrat.
– Lea hirpmáhuhtti man stuorra jápminerohus lea sohkabeliid gaskkas. Mii fertet fuomášahttit dán borasdávdda albmáid gaskkas árabut. Danin háliidit čalmmustahttit dan otne, go Miessemánu 26. beaivi lea liikeborasdávdda beaivi, lohká borasdávdasearvvi váldočálli Ingrid Stenstadvold Ross.
Kreftregistara logut čájehit ahte 2019:s lei oktiibuot 2330 olbmos liikeborasdávda, 1202 almmáiolbmos ja 1128 nissonolbmos. Oktiibuot jápme 182 albmá ja 98 nissona liikeborasdávdii Norggas.
Njeallje rávvaga
* Várut ahte liiki ii buole. Várut jus leat olu UV-suotnjarat. UV-indeaksa gávnnat yr.no áppas.
* Suddje liikki biktasiiguin dahje beaivvášklásaiguin. * Vuoidda liikki beaivvášsuddjenvuoidasiin, uhcimus faktor 30. Ale seastte vuoidasa. Vuoidda juohke nuppi tiimmu.
* Garvve solariuma dahje koansta beaivváža. Mađe nuorat olmmoš lea go geavahišgoahtá dan, dađe stuorát riskka.
