-Almmuhus-
-Almmuhus-
OĐĐASAT– Bealálaččat gáibidit mávssu «Utøya-raportta» ovddas

– Bealálaččat gáibidit mávssu «Utøya-raportta» ovddas

-

-

Kárášjoga ráđđeolmmái ii ávžžut gielddastivrra máksit bálkká dárkkistanlávdegotti ovddeš jođiheaddjái Ingvald Laitii ja ovddeš miellahttui Tore-Jan Gjerpii.

Ihttin meannuda Kárášjoga gielddastivra dárkkistanlávdegotti «Utøya-raportta» mas lea boahtán ovdán ahte gielda ii leat geavahan riekta «Utøya-milliuvnnaid».

Kárášjoga gieldda dárkkistanlávdegotti ovddeš miellahttu guovttos Ingvald Laiti ja Tore-Jan Gjerpe leaba dan barggu ovddas sádden 101 525 ruvdnosaš rehkega gildii. Ráđđeolmmái Elfrid Boine lea ge sádden liige mearkkašumi gielddastivrii dán áššis, mas ávžžuha ahte gielda ii mávsse sudnuide dan maid leaba gáibidan.

 

Bealálaččat

Máksin biehttaleami ákkasta dainna ahte ii leat goasse mearriduvvon sudnuide čađahit dan guorahallama. Dasa lassin čujuha Boine bealálašvuođa láhkii mas daddjo:

«Gieldda álbmotválljejuvvon olbmot sáhttet ovtta ja seamma áššiin šaddat bargat máŋgii, iešguđet doaimmaid olis gielddas. Danne ii leat buorre jus álbmotválljejuvvon olmmoš lea mielde meannudeame ášši man ieš lea leamaš mielde válbmeme, nu go gielddahálddahusbargin dahje álbmotválljejuvvon miellahttun álbmotválljejuvvon vuollásaš orgánas.

Dat lea duogážin go gielddalága paragráfa 40 nummár 3 bustávaide a ja c lea biddjon garrasat bealálašnjuolggadusat, go dábálaš bealálašnjuolggadusaide mat čuvvot hálddahuslága.»

 

Boine ii kommentere

Dasto dadjá ráđđeolmmái Elfrid Boine iežas mearkkašumis ahte dárkkistanlávdegotti jođiheaddji ja miellauttu leaba leamaš mielde meannudeame ášši dárkkistanlávdegottis, ja maiddái rapporta maid ieža leaba čállá, iige dát leat bealálašvuođa njuolggadusaid mielde.

Boine ii hálit kommenteret ášši.

– Dat lea álot dainna lágiin ahte dan rájes go ráđđeolmmái ovddida ášši politihkkariidda, de ii galgga šat kommenteret ášši, dadjá ráđđeolmmái Elfrid Boine.

Ášši joatká gova vuolábealde.


Kárášjoga ráđđeolmmái Elfrid Boine ii kommentere ášši.
Vuorkágovva: Astrid Helander
 

Doarjja advokáhtain

Kárášjoga ráđđeolmmái lea ráđđádallan maid ášši birra suohkaniid guovddášlihttu KS advokáhtain. Doppe dadjet jus soai eaba sáhtte duođaštit ahte gielda galgá mearrádusa, njuolggadusa dahje šiehtadusa mielde máksit honorára barggu ovddas, de lea boastut sudnuide máksit mávssu. KS advokáhttat vel deattuhit áibbas dábálažžan ahte politihkkarat geavahit ollu barggu muhtun áššiide maid ovddas eai galgga gáibidit diimmuid ovddas mávssu.

Ráđđeolmmái Elfrid Boine dadjá loahpas iežas mearkkašumis, ahte dákkár honoráraid máksin ii leat Kárášjoga gieldda njuolggadusaid ja dábiid mielde dasa mii guoská čoahkkinmávssuide. Ii ge gávdno šiehtadus dahje mearrádus dasa. Ráđđeolmmái ii ávžžut máksit honorára Laitii ja Gjerpii.

 

Loga maid: Ávžžuha gielddastivrra hilgut raportta

 

– Dárkkistanlávdegoddi mearridan

Dárkkistanlávdegoddi ovddeš jođiheaddji Ingvald Laiti ii hálit nu ollu kommenteret ášši, muhto dadjá ovttajienalaš dárkkistanlávdegoddi mearridii ahte soai galgaba dan barggu dahkat. Danne ii loga iežas áddet manne ráđđeolmmái oaivvilda ahte dasa ii gávdno šiehtadus.

– Dat mii guoská bealálašvuođa čuoččuhussii, de jorgalan gažaldaga ruovttoluotta, ahte ii bat ráđđeolmmái ieš leat dasto bealálaš go biehttala máksit honorára guorahallamis mas ieš lea guorahallon, dadjá Laiti.

Ovddeš miellahttu Tore-Jan Gjerpe ii hálit kommenteret áššái maide.

 

Ávžžuha hilgut raportta

Dárkkistanlávdegotti miellahttu Thoralf Henriksen logai ABC Nyheter siidui dán vahkkus ná:

– Stuora boasttuvuođat leat dahkkon dárkkistanbarggus, go okta gii jođihii dan barggu, lea ieš bealálaš ii ge leat dieđihan dan Dárkkistanlávdegoddái.

Henriksen ávžžuha dál Kárášjoga gieldda hilgut dárkkistanraportta gielddastivrras ihttin.

-Almmuhus-