-Almmuhus-
OĐĐASATBeakkán valáštalli áššáskuhtton rihkkon ráŋggáštus­lága

Beakkán valáštalli áššáskuhtton rihkkon ráŋggáštus­lága

-

-

Sámi beakkán valáštallii galgá diggái maŋŋel go lea áššáskuhtton rihkkon ráŋggáštuslága, čuoččuhuvvo ahte ii leat dieđihan ollislaš dahje rivttes dieđuid dáhkádusfitnodahkii maŋŋel ovtta vahága olgoriikkas.

Duorastaga suoidnemánu 25. beaivvi 2019 galgá ovddeš sámi beakkán valáštallii deavdán ja sádden vahát dieđu dáhkádusfitnodahkii, dál son lea áššáskuhtton go lea sádden eahperievttálaš vahátdieđuid dáhkádusfitnodahkii. 

Lihkohisvuohta olgoriikkas

Dáhkádusfitnodat IF oaččui vahátdieđu maŋŋel go ovddeš valáštalli lei gártan lihkohisvuhtii go lei galledan ovtta sihkkelpárkka Canadas. Dát lihkohisvuohta galgá geavvan suoidnemánu 16. beaivvi, ovcci beaivve ovdal go valáštalli sáddii vahátdieđu dáhkádusfitnodahkii. Ássášskuhttimis čuoččuhuvvo ahte vahátdieđáhusas ii leat dieđihuvvon ahte sus lei juo ovdalaččas vahát čielggis, justa seamma sajis go dán lihkohisvuođa maŋŋel. Son lei dan boares vahága dieđihan Norgga dáhkádusfitnodahkii golbma mánu ovdal, cuoŋománu 2019. 

Galgá leat rihkkon ráŋggáštuslága

Beakkán sámi valáštalli lea áššáskuhtton go lea rihkkon ráŋggáštuslága paragráfa 375 nuppi lađđasa, go lea eaktodáhtus dahkan dan vai oažžu dáhkádussupmi sutnje dahje earáide, ja lea addán vahátdieđu mii ii leat seamma go vahát, dahje eará vuogi mielde addán eahperehálaš dahje eahpedievaslaš dieđuid. Ráŋggáštusrádjá lea das sáhkku dahje giddagasráŋggáštus gitta guovtti jahkái.

Ii leat bargan boastut

Valáštalli advokáhtta Gøran Møller-Christiansen dieđiha ahte valáštalli ii háliit leat almmolaš dán áššis.

– Mii leat sihkkarat ahte min duođaštusovdanbuktimis boahtá čájehuvvot ahte son ii leat bargan maidige boastut. Son báljo ii sáhte vuordit dassái beassá ovdanbuktit su ášši dikkis, čállá advokáhtta Gøran Møller-Christiansen.

Diggeášši beaivádit Sis- ja Nuorta-Finnmárkku diggegoddi čakčamánu 17.beaivvi Čáhcesullo diggevisttis.

Ávvir ii ožžon Romssa ja Finnmárkku stáhtaadvokáhta Karoline Gjønnes Johansen ságaide áššis. 

-Almmuhus-