-Almmuhus-
KULTUVRABeaivváš vuorddaša «Boahtte geassi»

Beaivváš vuorddaša «Boahtte geassi»

-

-

Kabarea «Boahtte geassi» leat ge dearvvuođat Sámi Našunálateáhter Beaivvážis buohkaide, maŋŋel jahkebeali korona-pandemiijain.  Njukčamánu gaskkamuttus rievddai dilli, ja oallugat, nu go sii ge teáhteris, gárte ruovttus bargat, oahpu čuovvut, studeret ja soabadit nu bures go vejolaš.

Golggotmánu ovccát beaivvi beassat viimmat fas gehččiiguin deaivvadit, ja dasa mii gal illudit. Ii ge mannan geassi ge šaddan nu go dábálaččat, ja guhkkin eret nu go eatnasat ledje sávvan. Muhto doaivumis boahtte geassái lea dilli buorránan, dieđiha teáhter preassadieđáhusa bokte.

«Boahtte geassi»

Leaikkastallamiin ja dovddus lávlagiiguin muittašit sihke báikkálaš dáhpáhusaid, ja dáhpáhusaid muđui máilmmis, ja leat Roger Ludvigsen, Egil Keskitalo ja Nils Henrik Buljo geat ovdanbuktet «Boahtte geassi» kabarea, masa Egil Keskitalo lea čállán teavsttaid. Teáhterhoavda Rolf Degerlund lea bagadan čájálmasa.

Johtet čájálmasain

Maŋŋel čájálmasaid Guovdageainnus, Alfreds Kroas, golggotmánu 9. ja 10. beaivvi, finada kabarea maid Deanus (15.10), Kárášjogas (16.10), Álttás (24.10.) ja Romssas (31.10.). Fuomáš, koronadili geažil ii sáhte Sámi Našunálateáhter Beaivváš vuovdit nu ollu bileahtaid go dábálaččat, ja jus ii hálit manahit kabareaža, de ávžžuha teáhter ahte geahččit ordnejit bileahta ovdagihtii.

– Mii sávvat váimmolaš buresboahtima buohkaide, buriin movttain, ráinnas gieđaiguin ja goit unnimusat olles mehtera gaskkain, celket Sámi Našunálateáhter Beaivvážis.

-Almmuhus-