Dá leat dat geassevigit main Romsa- ja Finnmárkulaččat ballet eanemusat dán geasi.
Maŋŋel go guokte geasi leat luomustallan ruovttus, Norggas, de leat oallugat geat oidnet vejolašvuođa vuolgit olgoriikii fas geasset.
Ođđa iskkus man Respons Analyse lea čađahan Farmasiet ovddas čájeha ahte vuollel bealli Romsa ja Finnmárkulaččain ráhkkanit geassái ja ostet apotehkagálvvuid.
Nu go ovdal ge, de lea čuokkuhallat čuoikkaide ja buollit beaivvážii dat mas eatnasat ballet.
– Čukkohallat čuoikkaide gal gullá geassái, eanas norgalaččaide. Dat mii mu vuorjašuhttá lea go birrasiid bealli Romsa- ja Finnmárkulaččain ballet buollit beaivvážii dán geasi, ja birrasiid 40 % jerrojuvvon olbmuin ballet ihttaluvvat beaivváža goardimiin. Dá leat dakkár vigit maid lea hui álki garvit, ja jus daid ii garvve de sáhttet addit duođalaš váikkuhusaid, dadjá farmasøyta ja doaibmadirektevra Farmasiets, Stig Henning Pedersen preassadieđáhusas.
Luhčadávda
Lassin čuoikkaide, beaivvážii ja skohpalastojuvvon julggiide, de leat maid čoavjevigit badjin listtus mas Romsa ja Finnmárkulaččat ballet.
– Go mii mátkkoštit olgoriikii, de deaivvadit eará bakteriaflorain go dat masa leat hárjánan, ja de lea dávjá nu ahte čoavji bargagoahtá earáládje go dábálaččat. Dábálaš dávdamearkkat lea čoavjebávččas, feber ja luhčadávda, čilge Pedersen ja lasiha:
– Base, vuošša, garat dahje vajálduhte. Dat lea buorre muitonjuolggadus man válddát mielde mátkái. Muđui mii gal leat ovdalaččas bures hárjánan bassat ja desinfiseret gieđaid maŋŋel guokte pandemiija jagi.
