-Almmuhus-
Beassážat 2022Beaivváš bidjá leahtu beassážiidda

Beaivváš bidjá leahtu beassážiidda

-

-

Sámi Našunálateáhter Beaivváš lea maiddái dán vuoro stellen turneaplána vai dat nohká beassášdoaluin Guovdageainnus.  Beassážiidda leat sis guokte bihtá  maid čájehit. 

Sámi Našunálateáhter Beaivváš čájeha gaskavahku ja skilleduorastaga «Ellos eatnu! Nullpunkt» bihtá, mii lea ollásii Beaivváža iežas bihttá. Dat lea leamaš turneamátkkis guovvamánu álggu rájes ja loahpahuvvo beassážiid. 

– Čájalmasmátki lea mannan hui bures ja das leat leamaš olu geahččit. Lea duohta muitalus maid mii čájehit, ja bihttá heive sihke nuorra ja rávis olbmuide. Mii loahpahit dál dien turnea. Nu ahte geat eai leat vel dan oaidnán, fertejit dalle boahtit, dadjá teáhtera diehtojuohkinjođiheaddji Brita Triumf Ávvirii.

Beassážiid eai váldde luomu 

Beaivváš čállá ruovttusiiddus ahte čájálmas lea doku-drámá Áltá akšuvnna birra 1979 – 1982. Golbma olbmo geat oassálaste Álttá akšuvnnas, muitalit iežaset dáhpáhusaid birra dán bihtás geaid leat jearahallan dego vihttánin. Geahččit besset gullat golbma sámi oaidninsaji dán historjjás. Golbma váldodáhpáhusa leat nealgudeapmi Oslos 1979:s, politiijaveahka Savvonis 1981:s ja Fállejoga šaldi bávkaleapmi 1982:s. Čájálmas ovdanbuktojuvvo dialoga, monologa, lávluma ja juoigama bokte, ja das leat maid dokumentáralaš oasit. 

–Mis lea bajimus áigodat beassážiid. Eat leat goassege leamaš barggu haga beassážiid. Mii lávet heivehit čájálmasa maid dálvái, vai turneamátki loahpahuvvo Guovdageainnus beassážiid áigge, dadjá Triumf. 

MUOHTADIVGGAŽAT BIHTTÁ: Ivar Beddari, Mary Sarre, Marte Fjellheim Sarre. Dárogillii lea bihtá namma Lyden av snø. Preassagovva: Ingun A. Mæhlum
MUOHTADIVGGAŽAT BIHTTÁ: Ivar Beddari, Mary Sarre, Marte Fjellheim Sarre. Dárogillii lea bihtá namma Lyden av snø. Preassagovva: Ingun A. Mæhlum

Muohtadivggažat 

Guhkesbearjadaga ja 1.beassášbeaivvi čájehit ges čájálmasa «Muohtadivggažat»mii lea ovttasbargočájálmas Hålogaland Teateriin ja Festspillene i Nord- Norgein, Ferske Scener bokte.  Beaivvážis leat guokte neavttára das mielde, Marte Fjellheim Sarre ja Mary Sarre. Soai leaba dan nuppi bihtás maid neavttárat, nu ahte sudnos lea oalle olu bargu dan moatti beaivvis. 

Rawdna Carita Eira lea čállán čájálmasa. Dat lea čakčat čájehuvvon Romssas. Beaivváža diehtojuohkinhoavda muitala iežas vásáhusa ná:

– Lea hui somás bihttá. Go mun ledjen geahččan dan čájálmasa, de jurdilin oj, mun gusto ipmirdan ruoššagiela maid. In oba fuomášan ge doppe hupme giela maid mun in ipmir. Dat čájeha maid várra dan ahte rádjeolbmot nie gulahalle ovdalaš áigge. Lei somás bihttá mii lea ožžon buriid árvosániid. Sávvamis boađáše olbmot dan maid geahččat, dadjá Brita Triumf.

Duohta muitalusat

Muohtadivggažat čájálmasas čállá teáhter ahte lea máŋggagielat čájálmas ráhkaduvvon jáhkkemeahttun ja duohta muitalusaid vuođul Norgga, Suoma ja Ruošša rádjeguovlluin. Ruošša rádji rahppojuvvui moatti mánnui ja sihke norgalaččat ja suopmelaččat bohte valvin suohtastallat. Poehta ja dramačálli Rawdna Carita Eira lea čállán teavstta, ja bagadalli Kristin Bjørn lea lasihan muhtin teakstaoasážiid. Čájálmasas leat muitalusat báhtareami ja ruovttueatnamiid birra, ja maiddái máilmmi čiekŋaleamos ráiggi birra. Lávdegielat leat sámegiella, dárogiella, ruoššagiella, suomagiella ja eaŋgalasgiella, mat leat neavttáriid eatnigielat.

Triumf lohká iežaset illudit dáidda beassážiidda go besset viimmat fállat olbmuide teáhtervásáhusaid: 

– Lea hui erenoamáš go servodat lea rahpasan ja beassat čájehit nugo lávet. Muhto dieđusge lea vehá gelddolaš oaidnit bohtet go  olbmot nugo lávejit. Lea dat gal mannan bures turneas, nu ahte orru olbmuid mielas hui somá fas boahtit doaluide. Sávvamis lea beassážiid maid nu, dadjá son. 

-Almmuhus-