-Almmuhus-
OĐĐASAT– Beahtahallan Norgga stáhtii

– Beahtahallan Norgga stáhtii

-

-

Jovsset Ante Sara oabbá, dáiddár Máret Anne, gii lea dáidagiinnis bokte dorjon ja čalmmustahttán vieljastis lágastemiid stáhta vuostá, lea hirbmosit beahtahallan go stáhta dál lea guoddalan lágamánnerievtti duomu.

– Mun gal lean nu beahtahallan Norgga stáhtii, ahte in dieđe maid dasa galgá dadjat šat.

 

Orru dego mánnálaš nágggárvuohta
Sara mielas orru dego stáhta bealis mánnálaš nággárvuohta, mii lea mearkan ahte lea nu dehálaš prinsihpalaš riekteášši ahte sis ii leat ráđđi obage eará láhkai go guoddalit. Ákkastallan ahte unnidanmearrádus gorrelogu mielde ii rihko rievtti doaimmahit sámi kultuvrra ON-konvenšuvnna siviila ja politihkalaš vuoigatvuođaid 27. artihkkala mielde, lohká Sara stáda lágamannerievttis maid čuoččuhan.
– Duohtavuohta goitge lea ahte 75 bohccuin ii leat mihkke birgejumiid, ja dainna gal bággehallá eret boazodoalus. Dat lea duohtavuohta leamaš álggu rájes, ja dat duohtavuohta čuožžu ain, lohká son.

 

Ášši noađđin
Máret Ánne Sara mielas lea erenoamáš váivi oaidnit ahte su viellja galgá guoddit dán ná guhká go ášši lea bistán, gos sus ii leat diehtu iežas birgejumi ja boahtteáiggi birra.
– Guoddaleami dihte šaddá vuordit ain dan stáhta, vaikko lea guovtte geardde lágastan ja vuoitán. Dat lea hui váivi ja lossat nuorra olbmui, ja midjiide buohkaide, ja oainnán maid son vuorjašuvvá dainna. Dál ii leat go viidásit bargat áššiin, go ii leat ságas mihkkege eará, lohká son.

 

Njuolggosátta TV:s
Jovsset Ánte Sara siida leage dál johtime Fálái geasseorohahkii ja guottetbáikái, man NRK2 tv kanála sádde njuolggosáddagis minuhtas minuhttii. Máret Anne leage maid fárus johtime, ja vaikko eai leat vel jurddašan dan duomu guoddaleami birra lohkat maide TV:s, jáhkká son ahte dat boahtá ovdan.
 – Amma hal juo boahtá maid dan TV-sáddagis juoga ládje ovdan dát ášši, lohká Máret Anne Sara.

 

 

-Almmuhus-