Vaikke Nordlys birgehalai bures ráidonjunnošii vuostá, de leat beahtahallan go eai nagodan vuoitit Porsáŋggu vuostá. Dál lea mihttu vuoitit visot čiekčamiid vai birgehallet 4. divišuvnnas.
Vaikke Nordlys birgehalai bures ráidonjunnošii vuostá, de leat beahtahallan go eai nagodan vuoitit Porsáŋggu vuostá. Dál lea mihttu vuoitit visot čiekčamiid vai birgehallet 4. divišuvnnas.
Nordlys valáštallansearvvi A-joavkkus lea iešdovdu sákka buorránan maŋŋel go vuoitigohte ráidočiekčamiid čakčaáigodagas.
Buoret iešdovdu ii lean dattege doarvái go deaivvadedje kránnjágieldda searaiguin.
Porsáŋggu valáštallansearvi ja Nordlys juogadeigga čuoggáid, boađus ievttá čiekčamiin gárttai 1-1.
– Maŋŋel čiekčamiid leimmet beahtahallan, erenomážit go Porsáŋgu bážii moala čiekčamiid badjeláiggis. Mii massiimet guokte čuoggá vaikke leimmet árrat sáhttit čájehit vuoitofámuid, dađibahábut eat deaivan moala, lohká Nordlys kapteaidna Tom Erik Biti.
Eai ballan
Vaikke Porsáŋggu valáštallansearvi lea Finnmárkku 4. divišuvnna ráidočiekčamiid njunuš, de eai birgehallan kárášjohkalaččaiguin geat leat tabealla 7. sajis.
– Mii leat dušše oktii vuoittahallan maŋŋel geasseluomu, buoret iešdovdduin lei mis buorre doaivva vuoitit Porsáŋggu vuostá. Mii stivriimet čiekčama ja Porsáŋgu dat šattai ráhčat. Mii suohtastalaimet spábbačiekčanšilljus, eat ge mii ballan nuppi joavkkus. Lea dábálaš ballat joavkkus mii lea birgen buorebut, muhto mis lea olu mokta joavkkus ja mii duosttat eanet go ovdal, dadjá Biti.
Moallaolbmáid eahket
Nordlys spábbačiekčanjoavkkus leat máŋga nuorra čiekči, ja sii čájehedje erenomáš buriid fámuid ievttá čiekčamiin.
Ovttajienalaččat válljejuvvui Nordlys moallaolmmái Niillas Magnus Skoglund bána buoremussan.
– Niillas Magnusis lei buorre čiekčan ja son ánssáša rámi. Son lea rievtti mielde gándajoavkku čiekči, ja lei ge danin erenomáš suohtas go lihkostuvai buoremusaid vuostá. Eará nuorra čiekčat maid čikče bures, sii gal eai čájehan makkárge gudnevuollegašvuođa porsáŋgulaččaide, rábmo kapteaidna.
Porsáŋggu moallaalbmás, Aleksander Spasic lei maid erenomáš buorre čiekčan go son dat gájui joavkku čuoggá, son čievččastii Porsáŋggu moala 2 minuhtta badjeláiggis.
Bueng bážii moala
Nordlys moallabáhčči ges lea Nils Mikal Bueng Gaup. Son bidjalii spáppa mollii čiekčamiid 52. minuhtas.
Bueng Gaup ii leat čiekčan moatti maŋimuš čiekčamiid go leamaš roasmmohuvvan.
– Mii illudat go son lea fas ruovttoluotta ja go moala vel bidjalii, lohká Biti.
Porsáŋggu spábbačiekčit ledje diehttelasat skurtnjagan maŋŋel čiekčamiid.
Joavkku Facebook neahttasiiddus čállet ahte leat beahtahallan.
– Dievdduid áigumuš lei dieđusge vuoitit maiddái odne, muhto nu ii šaddan. Joavku lea beahtahallan ja maŋŋel čiekčamiid lei sis guhkebuš ságastallan hárjeheddjiiguin. Lea lohpi beahtahallat, muhto mii áigut fas vuoitigoahtit.
Fertejit vuoitit buot
Ráidočiekčamat loahpahuvvojit golggotmánu 1. beaivvi. Guovtti boahtte čiekčamiin leat Nordlys joavkkus garra vuostálastit.
Sii deaivvadit vuos ruovttušilljus Lávželuovttain mii lea 3. sajis ráidočiekčamiin. Dan maŋŋel galget čiekčat Honnesvági vuostá.
– Min áigumuš lea vuoitit buot čiekčamiid ovddasguvlui. Mii fertet vuoitit vai bissut dán divišuvnnas. Mii loahpahat ráidočiekčamiid Guovdageainnu vuostá Niittoguolbanis, ja dieđán ahte gánddain lea sákka miella vuoitit go jo eat birgehallan singuin giđđat, bohkosa kapteaidna Tom Erik Biti.
