Áilen Nigá Máhtte dieđihii maid sámi jienasteaddjit leat sutnje váidalan go buot lea digitála hámis.
Norgga Sámiid Riikasearvvi áirras Áilen Nigá Máhtte, Mathis Nilsen Eira cuiggodii Sámedikki dievasčoahkkima ja jođihangotti Sámedikki vuođđudančoahkkimis mannan maŋŋebárgga.
– Lea go dievasčoahkkin seastán maidege ja leago rievdan mihkkege maŋŋel go digitála diehtojuohkin lea šaddan áidna gaskkusteapmin álbmogii? Dievasčoahkkima guldaleaddjit váillahit čállojuvvon báhpáriid ja vejolašvuođa čuovvut digaštallama go eai gávnna dieđuid guđe ášši meannuduvvo. Váilevaš dieđut dagahit ahte dábálaš guldaleaddjit eai šat boađe Sámediggái guldalit, logai Áilin Nigá Máhtte.
Son čilge ahte leat sámi álbmoga jienasteaddjit geat su lea jearadan ja lohkan sii dovdet iežaset dego bázahallan. Son lohká dáid olbmuid mielas lea dego Sámediggi livččii čiehkádan go sii eai gávnna áššebáhpáriid, eaige gávnna almmuhusa goas dievasčoahkkimat dollojuvvojit.
