-Almmuhus-
OĐĐASATBátnedearvvašvuohta bissu fylkkagieldda hálddus

Bátnedearvvašvuohta bissu fylkkagieldda hálddus

-

-

Stuoradikki suohkan- ja hálddašanlávdegoddi cealká ahte bátnedearvvašvuohta galgá bissut fylkkagielddas. – KS lea ilus go Stuoradiggi lea váldán suohkansuorggi cealkámušaid vuhtii, dat lea dehálaš vai álbmogis áin lea buorre fálaldat, lohká KS stivrajođiheaddji Gunn Marit Helgesen.

Ráđđehus lei evttohan sirdit bátnedearvvašvuođa fylkkagielddain suohkaniidda, regiovdnareforpma evttohusas. Sihke odontologalaš fágabiras, fylkkagielddat, suohkanat ja KS vuosttaldedje evttohusa. Evttohus ii ožžon eanetlogu Stuoradikkis. Suohkanat mat háliidit, sáhttet 2020 rájes ohcat oažžut sirdot sidjiide dan ovddasvástádusa. Dat lea geahččalanortnet. Dan dieđiha KS preassadieđáhusas.

 

Cuiggodan ráđđehusa

Cuiggodeaddjit leat ovddidan ahte otná modealla doaibmá bures. Fylkkagielddat doaimmahit dehálaš eastadeaddji barggu ja leat olu bátnedoaktárat riikkas, maiddái spesialisttat. Áiggi mielde leat nana fágabirrasat huksejuvvon fylkkaide.

– Mii leat KS:s cuiggodan ráđđehusa paradoksála ákkastemiid. Sii lohket suohkanreforbma sihkkarastá stuorát ja nannosit fágabirrasiid, muhto bátnedearvvašvuođareforbma livčče doaibmat juste nuppe ládje. Dat livčče hágget min fágabirrasiid. Danne leat hui ilus dál go eanetlohku lea min guldalan, lohká Gunn Marit Helgesen.

-Almmuhus-