Jagi 2020 rájes ii leat Norggas šat lohpi ligget makkárge viesuid oljouvnnain, earret barttaid mas ii leat elrávdnji.
Jagi 2020 rájes ii leat Norggas šat lohpi ligget makkárge viesuid oljouvnnain, earret barttaid mas ii leat elrávdnji.
Norgga ráđđehus evttohii mannan duorastaga gieldit oljoboaldin vugiin ligget dáluid, ealáhusviesuid ja almmolaš viesuid, čállá NTB.
– Eará molssaeavttut menddo divras
Barttat main ii leat elrávdnji, besset ain geavahit oljju ligget bartta.
Dálkkádat- ja birasministtar Vidar Helgesen (Olgešbellodagas) čilge barttaid beassat gildosis dan sivas go lea váddásat ja menddo divrras eará molssaeavttuid geavahit.
– Dasa lassin ii váikkut nu olu barttaide. Go buohtastallá dálkkádatváikkuhusaid goluid ektui, de šaddá menddo divrras, čilge Helgesen.
– Stuorra váikkuhus Norgii
Dán evttohusa mielde, mii sáddejuvvui juovlamánu 2016 gulahallamii, galgá dát gielddus biddjot fápmui 2010s.
Birasvuođđudus ZERO mielas lea dát gielddus dehálaš ja dieđiha čielgasit ahte mii guođđit fossiilla energiija ja geavahišgoahtit ođasmahtti energiija dan sadjái.
– Norgga viesut šaddet vuosttaš oljokeahtes suorggit máilmmis. Dán mearrádusas leat stuorra váikkuhusat Norgii ja riikkaidgaskasaččat ja čájeha ahte Norga sáhttá leat njunnošis jus dan háliidat, lohká ZERO-jođiheaddji Marius Holm.
Vuođđudus oaivvilda lea vuosttaš gearde go oktage riika gieldá oljju geavahit liggemii ceggejuvvon viesuide.
Olu riikkat leat juo gieldán bidjamis ođđa oljoboaldinuvnnaid, nu mo Norga lea dahkan daid ođđasamos huksenteknihkalaš njuolggadusain.
