Sámediggeráđđi Henrik Olsen lea beahtahallan go sis lea leamaš mandáhtta dušše bušeahta čuohppat.
Sámedikki 2020 bušeahtta mearriduvvo juovlamánu dievasčoahkkimis, ja dál lea Sámediggeráđđi ráhkadan 2020 bušeahttaevttohusa.
– Dán jagi bušeahttabargu lea leamaš earenoamáš lossat danne go bušeahta duohta rámma lea ollu unnon. Dađi bahábut eat nagot 2020 bušeahtas gávdnat ruđaid ollu buriid initiatiivvaide ja áigumušaide maid doarjut galggašii, earenoamážit kultursuorggis, danne go bušeahtta duohta rámma lea unnon 12 miljovnna ruvnnuin, dadjá sámediggeráđi Henrik Olsen preassadieđáhusastis.
Son lohká dán jagi lea ráđđehus mearridan gokko galgá lasihuvvot, Sámediggi lea beassan dušše mearridit gokko sámi servodagas čuohppat galgá.
13 miljovnna ruvnnu Giellaloktemii
Ráđđehusa lasáhusat Sámediggái stáhtabušeahttaevttohusas leat merkejuvvon ruđat ja ruhtageavaheapmi galgá departemeanttain konsulterejuvvot. Sámediggi lea ožžon 13 000 000 ruvnno Váibmogiela čuovvoleapmái ja 1 000 000 ruvnno Sámedikki bargui givssideami vuostá. Daid doaibmabijuid áigu Sámediggi vuoruhit dán jagi bušeahtas.
– Sámediggeráđđi čuovvula ráđđehusa merkejuvvon ruđaid sámegielaid nannemii. Mii bidjat 13 miljovnna ruvnnu Giellaloktema čuovvuleapmái, ja dat mearkkaša ahte giellabargu šaddá nannejuvvot máŋgga suorggis, dadjá Olsen.
– 12 miljovnna duohta vuoládusain
Sámediggi oažžu evttohuvvon 2020 stáhtabušeahtas 0,3 proseantta bálkálasáhusa. Muđui lea bušeahtas 3 proseantta lasáhus.
Sámediggi juolluda guokte goalmmadasoasi bušeahtas doarjjan sámi ásahusaide, sámi servodahkii ja sámi guovlluid álbmogii. Dat oassi stáhtabušeahtas ii lea hatti dáfus justerejuvvon. Sámi servodahkii dat buktá stuorra váikkuhusaid go sámi ásahusat, nu go sámi mánáidgárddit, giellaguovddážat, sámi museat ja táhterat, eai beasa bisuhit dálá doaimma, muhto fertejit baicce geahpedit doaimmaset.
– Rámma, man leat ráđđehusas ožžon, 12 miljovnna duohta vuoládusain, lea dahkan dán jagi bušeahttabarggu hástaleaddjin. 0,6 proseantta bálkálasáhus, man evttohit Sámedikki politihkalaš ja hálddahuslaš doibmii ja buot min fásta doarjjavuostáiváldiide, mearkkaša unnit lasáhusa buohkaide earret bálká- ja haddelassáneapmi mii 2020:s vurdojuvvo. Dat máksá ahte gaska sámi servodaga ja dáža servodaga gaskka stuorru eanaš surggiin, sámi servodahkii vahágin, dadjá Henrik Olsen.
Vihtta girjebusse jotkojuvvojit
Sámediggeráđđi čuovvula dievasčoahkkima girjjálašvuođagieđahallama earret eará sámi girjjálašvuođabuvttadeami nannemiin 5,1 miljovnna ruvnnuin ja girjjálašvuođagaskkustanvirggiid ásahemiin Mátta- ja Julevsámi guovlluide, ja Henrik Olsen lea ilus go vihtta girjebusse jotkojuvvojit ain Sámedikki doarjagiin.
Dáppe lea ain girjebussefálaldat:
Kultuvre- jïh gærjabusse Trøndelagas, Davvi-Romssa Sámi girjebusse ja Mátta-Romssa girjebusse, Guovdageainnu ja Enodaga girjebusse ja viđat girjebusse mii jotkojuvvo lea Deanu ja Unjárgga girjebusse.
Eat ožžon ságaide
Ávvir ii leat lihkostuvvan oažžut Bargiidbellodaga parlamentáralaš jođiheaddji Ronny Wilhelmsena kommenteret ráđi bušeahttaevttohusa.
