Jus Avinor penšuvdna-čuolbma ii čoavdás de sáhttá bargoheaitta váikkuhit gávcci girdišilljui.
Duorastaga galget NTL ja LO deaivvadit Avinorain, Avinor Flysikring ja Spekteriin Riikkasoabaheaddji luhtte geahččalit garvit bargoheaitaga.
Jus eai šatta ovttaoaivilis, álgá bargoheaitta áramusat bearjadat iđida, čállá Fremover.
Deike čuohcá bargoheaitta
LO Stat dieđiha ahte 196 NTL-miellahttu geat barget Avinoras, váldojit bargoheaitagii jus bealit eai nagot soabadit.
Olusat sis geat barget buollin- ja gáddjunbálvaleamis girdišilljuin, gullet NTL searvái, muhto lea eahpečielggas giddejuvvojit go girdišilljut dan vejolaš bargoheaitagis.
Avinoras eai hálit vel kommenteret makkár váikkuhusat šaddet jus bargoheaitta biddjo doibmii.
Dáid girdišilljuide čuohcá vejolaš bargoheaitta (ruođuid siste čuožžu galle bargi váldojuvvojit bargoheaitagii):
Álttá girdišillju (19)
Honnesvágii girdišillju (10)
Rørvik girdišillju (9)
Sandane girdišillju (15)
Stavanger girdišillju (81)
Svolvær girdišillju (8)
Oslo girdišillju Gardermoen (25)
Avinor flysikring (4)
Avinor váldokántuvra (14)
Penšuvdna váldogažaldahkan
Bealit eai leat ovttaoaivilis das ahte geain lea riekti šiehtadallat ođđa penšuvdna ortnega Avinor bargiid várás.
NTL ja LO gáibidit ahte bargiin galgá leat šiehtadallanvuoigatvuohta, nu mo sis lea leamaš 2003 rájes.
Bealit deaivvadedje soabadit seamma fáttá birra maiddái guokte jagi dassái.
