Akan gelbbolašvuođaguovddáš cuiggoda váilevaš njuolggadusaid go alkohola juhkko barggu oktavuođas.
Akan gelbbolašvuođaguovddáš cuiggoda váilevaš njuolggadusaid go alkohola juhkko barggu oktavuođas.
#METOO- kampánnja deattuha dárbbu čielga guottuide ja rabasvuođadábiide bargoeallimis. #Metoo- kampánja maŋŋel fuomášuhtte eará oasit bargoeallimis seksuálalaš loavkašuhttimiid, nu go bellodatpolitihkas.
– Mii leat beare guhká dohkkehan láhttemiid mat eai leat dohkálaččat Norgga bargoeallimis, lohká Akan gelbbolašvuođaguovddáža fágajođiheaddji Camilla Lynne Bakkeng preassadieđáhusas.
Alkoholakultuvra
Ollu áššit mat dáhpáhuvvet muitalit ahte seksuálalaš loavkašuhttin dávjá dáhpáhuvvá diliin go alkohola maid juhkko, juoga mii dahká ahte dat vuosttažettiin lea sáhka alkoholakultuvrras.
– Lea sáhka dihtomielalašvuođas iežas alkoholakultuvrras. Mii eat gáro hupmat dan birra mii dáhpáhuvvá go mii jugadit fárrolaga, go ballat billisteames suohtastallama, oaivvilda Bakkeng.
Hukset kultuvrra
Seksuálalaš loavkašuhttimiid fuomášupmi nanne dárbbu čájehit čielga guottuid ja rabasvuođa bargoeallimis. Akan gelbbolašvuođaguovddáš váillaha čielga rájiid mat muitalit mii leat dohkálaš ja mii ii leat dohkálaš bargoeallimis ja barggu oktavuođas.
Sii váillahit maid čilgehusaid movt dakkár láhttema galgá gieđahallat.
– Deháleamos lea hukset kultuvrra mas buohkat dovdet rájiid. Dasa lassin fertejit mis leat jođiheaddjit geat vuhtii váldet ja gieđahallet láhttenvugiid mat eai leat dohkálaččat, lohká Camilla Lynne Bakkeng.