Deanu gielda lea geargamin lohkamis jienaid, ja gaskaboddosaš bohtosat čájehit ahte eanetlohku deatnulaččain háliidit Bargiidbellodaga (Bb) stivrejumi ain boahtte njeallje jagi.
Deanu gielda lea geargamin lohkamis jienaid, ja gaskaboddosaš bohtosat čájehit ahte eanetlohku deatnulaččain háliidit Bargiidbellodaga (Bb) stivrejumi ain boahtte njeallje jagi.
Gaskaboddosaš bohtosat čájehit ahte Bargiidbellodat oažžu ovcci áirasa gielddastivrii, oktiibuot 47,3 proseantta jienastedje Bb, mii lea 13 proseantta eambbo go mannan válggain.
– Mii leat hui duđavaččat, manai ollu buorebut go leimmet vuordán, lohká Bb várresátnejođiheaddjeevttohas Elisabeth Erke.
Deanu gielddastivrras lea rievdan gielddastivrra áirraslohku, go boahtte áigodagas leat 19 áirasat ja dálá áigodagas leamašan 23 áirasa. Deanu sátnejođiheaddji ja válgastivrra jođiheaddji Frank Ingilæ ii leat vel ollen boahtit Bb válgadoaluide, muhto son lohká iežas duđavažžan go Ávvir háleštii suinna telefovnna bokte diibmu dás ovdalaš.
