-Almmuhus-
-Almmuhus-
OĐĐASATBargiidbellodat háliida bieggafámu áhpái … muhto eai ožžon doarjaga eanetlogus vaikke lei...

Bargiidbellodat háliida bieggafámu áhpái … muhto eai ožžon doarjaga eanetlogus vaikke lei dušše smávva erohus ráđi evttohusas

-

-

Bargiidbellodat evttohii Sámedikki dievasčoahk­kimis jávkadit buot sámi guovlluid Norgga čáhcádat- ja energiijadirektoráhta (NVE) bieggafámu rámmaplánas.

Sámediggi gieđahalai dievasčoahk­kimis nationála rámmaplána man Norgga čáhcádat- ja energiijadirektoráhtta (NVE) lea ráhkadan Oljo- ja energiijadepartemeantta ovddas.

NVE evttohus lea guovtti oasis, ja okta dain lea kárta mas almmuhit guovlluid gosa bieggafápmu heive.

Bargiidbellodat dadjá čielgasit ahte sii eai áiggo eambbo bieggafápmohuksema eatnan alde, Sámi guovlluin.

Sii celket preassadieđáhusas ahte Sámi vuođđoealáhu­sain leat jo goariduvvon ollu guovllut, ja ahte dál lea doarvái.

 

Konklušuvdna earuha

Go ášši manai meannudeapmái dievasčoahkkimis, de ledje golbma evttohusa, ráđi evttohus, ­Bargiidbellodaga evttohus ja Ovdda­dusbellodaga evttohus.

Bargiidbellodaga áirras Arild Pettersen Inga čilge ahte sin evttohusa konklušuvdna lea mihá ­garraseabbo go NSR evttohus.

– Mii dadjat mihá čielgaseappot go NSR ahte bieggafápmu ii galgga dohkkehuvvot Sámi guovlluide, dadjá Inga.


ÁHPÁI: Bargiidbellodaga Ronny Wilhelmsen ja Arild Pettersen Inga. Bargiidbellodat evttohii hukset bieggamilluid áhpái, ovdalii go eatnan ala. 
Vuorkágovva: Roy Arthur Olsen

 

Gehččet ollislaččat

Bargiidbellodaga Ronny Wilhelm­sen muitala ahte sii vigget geahč­čat ollislaččat bieggafápmo-ášši, ja ahte danne sii háliidit ahte biegga­fápmu ii oba galgga ge Sámi guovlluide.

– Posišuvdna bidjá eavttuid NVE raportii ja mii geahččat ­viidábut ášši. Mii eat dohkket ­eavttuid maid NVE ja eiseválddit bidjet raportii. Mii baicca geahččat ášši ollislaččat ja boahtteáigásaččat, dan botta go NSR geahččá dušše raportta.

 

Bieggamillot áhpái

Ovdalii go eatnan ala ceaggut biegga­milluid, de áiggošii Bargiidbellodat bidjat bieggamilluid áhpái, go sii oaivvildit ahte mearra­biegga lea oassi ruoná molsu­mis. Olju nuoskkida ollu, ja ovdalii go oljju ja gássa, de galgga­šii eará buvtta man vuovdá olgoriikii.

– Lea dehálaš ahte bieggamillot huksejuvvojit áhpái, eai ge riddoguovlluide, go ábis eai leat guolásteddjiid ovddas. De lea dehálaš ahte Sámediggi lea mielde eaktudeamen movt mearrabiegga galgá ovdánit, dadjá Ronny Wilhelmsen.

 

Eanetlohku

Áilen Nigá Máhtte, dahje Mathis Nilsen Eira (NSR), muitala ahte sii baicca gáibidit ahte boazodoallo­guovllut váldojit eret NVE kárttas ja ahte ii galgga hukse­juvvot eambbo bieggafápmu Sámi guovlluide.

– Sávaldat livččii ahte vel ­stuorit eanetlohku livččii dákkár áššis, go mii han leimmet lávdegottis lahko­neame ovttaoaivilvuođa, muhto de ášši maŋiduvvui, muitala Eira.

 

Smávva erohusat

Son dadjá ahte dán áššis ii lean sáhka galget go bieggamillot ­biddjot áhpái vai eai, muhto ­galget go oba ásahuvvot ge.

– Eai lean go smávva erohusat min evttohusas, muhto mii eat boahtán ovttaoaivilvuhtii go Bargiid­bellodat áiggui merrii ­bidjat daid bieggamilluid.

 

– Muhto Bargiidbellodat han ii áigon merrii bieggamilluid, muhto áhpái?

– Mii eat hálit dohko ge bidjat daid go doppe han maid nuoskkidit ja gáržžidit. Daid doallat ortnegis mielddisbuktá nuoskkideami. Muhto dat mas leimmet sullii ovttaoaivilis lei ahte bieggamillot eai heive boazoguohtuneatna­miidda, čilge NSR áirras.

-Almmuhus-