Vaikko bargguhisvuohta badjána muđuid Norggas, de njiedjá dat Finnmárkkus.
Vaikko bargguhisvuohta badjána muđuid Norggas, de njiedjá dat Finnmárkkus.
Bargguhisvuođalogut Finnmárkkus leat dál 3,6 proseantta. 1 426 olbmo leat dieđihuvvon barggu haga, mii lea 31 olbmo unnit go diibmá.
Njiedjan
– Vaikko ruvke koŋkánii Mátta-Várjjagis, de oaidnit ahte bargguhisvuohta njiedjá fylkkas. Okta sivain lea áigodatbargguid variašuvdna, nu go guolástusealáhusas. Eai leat nu ollugat geaid fertejit gaskaboddosaččat cealkit eret nu go diibmá, muitala NAV Finnmárkku seniorráđđeaddi Eva-Lill J. Margit.
Ollugat leat maid bargomárkandoaimmain, mat váikkuhit bargguhisvuođaloguid.
Ollu rabas virggit
Dál leat 334 rabas virggi fylkkas mat leat NAV registaris. Ollu virggiide gáibiduvvo alit oahppu, ja lea tendeansa maid NAV vuohttá: eanet virggiide gáibiduvvo alit oahppu dahje unnimusat fágaoahppu.
Muhto leat ain rabas virggit maidda ii dárbbašuvvo alit oahppu. Leat ollu fitnodagat dál mat ohcet luopmobargiid dahje vikáraid. Muđuid ohcet maid oahpahalliid.
Bajimus ja vuolimus
Gáŋgaviikkas lei buot alimus bargguhisvuođalohku, namalassii 7,2 proseantta, ja nubbin alimus lohku lei Guovdageainnus, 6,5 proseanttain. Vuolimus lohku lea Porsáŋggus gos lea 2 proseantta bargguhisvuohta. Mátta-Várjjagis ain badjána bargguhisvuohta, ja leat 150 eanet olbmo barggu haga diimmáža ektui.
