– Lean dahkan iežan barggu, dadjá lihccojuvvon váldodoaimmaheaddji Thomas Nilsen.
– Lean dahkan iežan barggu, dadjá lihccojuvvon váldodoaimmaheaddji Thomas Nilsen.
BarentsObserver dieđihii odne iđđes ahte sin váldodoaimmaheaddji Thomas Nilsen lea lihccojuvvon.
Reivves man Barentsčállingotti stivrajođiheaddji Stig Olsen odne lea geigen áviisii, čállo ahte Nilsen galgá dalán heaitit váldodoaimmaheaddjin, čállá áviisa ieš.
– Dahkan iežan barggu
Reivves ákkastallet eahpeluohtehahtti láhttemiid leat sivvan dasa go Nilsen massii barggus.
– Mun lean dahkan juste dan mii lea váldodoaimmaheaddji geatnegasvuohta. Mun lean bealuštan min doaimmahuslaš friddjavuođa, dadjá Nilsen.
Háliidedje čuovvut redaktevrapláhkkáha
Duogáš áššái lea dat go BarentsObserver giđđat háliidii vuolláičállit redaktevrapláhkáha. Dan ii dohkkehan Barentsčállingoddi, ja Nilsen oktan doaimmahusain čálle dasto garra kommentára dán mearrádusa birra.
Barentsčállingoddi mearridii ahte áviisa ii galgga leat iešheanalaš ođasneahttabáiki, muhto baicce Barentsčállingotti diehtojuohkinossodat.
– Mii leat fuolas go min eaiggádat leat mearridan ahte BarentsObserver ii galgga redigerejuvvot preassa friddja diehto- ja oaivilgaskkusteami prinsihpaid mielde, čálii doaimmahus dalle.
Áviissa eaiggádit Barentsčállingoddi, man fas eaiggádit Norgga davimus fylkkagielddat. Neahttaáviisa lea 2002 rájes gaskkustan dieđuid ja ođđasiid Barentsguovllu birra.
Redaktevrapláhkkát gieldá váldodoaimmaheddjiid diktimis eaiggádiid stivret iežaset, ja eanaš friddja áviisat gullet dán šiehtadussii.
Ávvir ii leat fáhten Barentsčállingotti stivrajođiheaddji Stig Olsen ságaide dán áššis, muhto BarentsObserverii lea Olsen lohkan ahte ii dáhto kommenteret ášši.
