Cuoŋománu 17. ja 18. beivviid deaivvadit badjel čuođi fidnofágaoahppi Barentsregiovnnas ArcticSkills fidnofágagilvvus, dán háve Tornios.
Cuoŋománu 17. ja 18. beivviid deaivvadit badjel čuođi fidnofágaoahppi Barentsregiovnnas ArcticSkills fidnofágagilvvus, dán háve Tornios.
Goalmmát geardde lágiduvvo fidnofágagilvu ArcticSkills, gos fidnofágaoahppit miehtá Barentsregiovnna deaivvadit.
Dán háve lágiduvvo dát cuoŋománu 17. ja 18. beivviid Tornios, suomabealde.
– Ii sáhte šaddat eambbo «Barents»
Oahppit gilvvohallet 15 fágas ja bohtet skuvllain Tornios, Tornedalenis, Anáris, Roavvenjárggas, Kemiijas, Girkonjárggas, Álttás, Guovdageainnus ja Várggáin.
Olles Murmánska regiovdna ovddastuvvo, ja vuosttaš geardde servet maiddái Haparanda oahppit Norrbottena bealde. Oasseváldit bohtet gitta Tajmyras Sibiris.
– Eambbo «Barents» ii sáhte šat šaddat, dadjá movttegis Trond Hansen, Finnmárkku fylkkagielddas, ArcticSkillsa prošeaktajođiheaddji preassadieđáhusas.
Olu oasálastit
Lágideaddjit leat ráhkkanan váldit vuostá 120 oasseváldi ja fágaoahpaheddjiid. Guossit bohtet organisašuvnnain ja fitnodagain mat iešguđet ládje váikkuhit ovdáneami fidnofágain.
1500 nuoraidskuvllaoahppi geat bohtet Tornedalenis ja Kemis galget finadit gilvvuin gos galget oažžut karriearabagadallama.
– Ii leat beare dávjá ahte fidnofágain lea Barentsregiovnnas ná stuora fokus, dadjá Hansen.
Hábmejit ustitvuođa
Prográmmas ii leat dušše gilvu. Oahppit galget maid beassat oahpásnuvvat vánddardeami, workshoppaid ja sosiála ovttasteami bokte.
Buot geavvá Fidnofágainstituhta Lappia guovllus. Dat lea stuora campus Tornios gos leat olu návccat. Ohppiin lea danne vejolašvuohta oahpásnuvvat ja čatnat ustitvuođaid, seammás go besset veahá čuovvut mielde maid dat eará oasseváldit barget.
– ArcticSkills ii galgga dušše vuorbádit vuoiti, muhto maiddái hábmet ustitvuođaid Barentsregiovnnas, moddjá son.
Doppe bohtet leat olu dulkkat geat veahkehit ohppiid gulahallat, dasa lassin go ohppiin lea buorre vejolašvuohta hárjehallat eaŋgalasgiela.
Garra gilvu
Finnmárkku joavkkus leat meaštárat geat serve Finnmárkku meašttirgilvui mii lágiduvvui Girkonjárggas guovvamánus. Sii leat eret Álttás, Várggáin, Girkonjárggas ja Guovdageainnus.
Oahppit Finnmárkkus vázzet nuppi jagi joatkkaskuvllas. Dan sivas go Norggas lea veahá eará skuvlastruktuvra go Suomas ja Ruoššas, de bohtet sii deaivvadit 3. ja 4. jagi ohppiiguin ránnjáriikkas.
– Boahtá danne šaddat garra gilvu, muhto leat ovdal vásihan ahte sáhttet šaddat dássedis gilvvut, dadjá Trond Hansen.
Finnmárkkujoavku:
Fága | Finnmárkkumeašttir | Fágadovdi/oahpaheaddji | Skuvla |
Mašiidnavuoddji | Emil Lillevik | Trond Dikkanen | Girkonjárga |
Biilavahágat, láhkka ja karosseriija |
Natalie Jørgensen Olsen Andrea Hågensen Hjelm |
Bjørn Tore Andersen | Girkonjárga |
Design ja duodji | Ina Máret Gaup | Elle Marit Eira | Guovdageaidnu |
Elektrihkkár | Torbjørn Antonsen | Gjermund Hansen | Girkonjárga |
Vuoktačuohppi | Andrea S Halstensen Rimala | Ellen Kristoffersen | Girkonjárga |
Dearvvašvuođabargi | Malene Erke Johnskareng | Anette Granlund | Girkonjárga |
IKT-fága | Karl-Ivar Rødberg Granshagen |
Runar Kofoed Arnulf Nilsen |
Várggát |
Fievrrut | Eirin Andersen Nødtvedt | Kjell Malin | Girkonjárga |
Goahkka | Julia Synnøve Andersen | Tor Erik Andreassen | Girkonjárga |
Boazodoallu |
Nils Olaf Eira Hætta Sara Biret Elle Bongo |
Karen Inga Kemi | Guovdageaidnu |
Sveisen | Gunn Tove Holmstedt | Yngve Kristoffersen | Áltá |
Snihkkár | Johannes Ærø | Harry Marjavara | Girkonjárga |
Bohccebargi | Knut Martin Kivilæ | Roger Konradsen | Girkonjárga |