Dál orru čájeheame ahte leat máŋga miljárdda oljofáhta Barentsábis, ja dál jáhkket Ruošša ráji bokte gávdnat ollu oljju.
Dál orru čájeheame ahte leat máŋga miljárdda oljofáhta Barentsábis, ja dál jáhkket Ruošša ráji bokte gávdnat ollu oljju.
– Jus bohtosat leat buorit ja buot eahpesihkkaris oasit čájehit buriid bohtosiid, de lea sáhka máŋga miljárdda fáhta oljjus, muitala Kristian Kråkenes NRK:i.
Son lea Kufpec bohkanhoavda, mii lea internašunála fitnodat Kuwait stáda oljofitnodagas, Kuwait Petroleum Corporation, KPC.
Ruošša ráji lahka
Statfjord, mii lea Norgga stuorimus oljobohkanguovlu, lea buvttadan vihtta miljárdda fáhta oljju álggu rájes 1970-logus. Ođđa seismalaš iskkademiid teknologiija addá oljodoaivaga.
– Ovdal čájehedje guovtti dimenšunálasaš govat gos oidnojedje linjját mat manne ruossut rássut. Dál lea 3D-data mii dahká ahte oažžut ollu buoret govaid, muitala Kråkenes.
– Mii oaidnit eanet guovlluid gos lea oalle coagis ja viiddis, ja gos sáhttá leat ollu olju. Erenoamážit guovllut mat leat lahka Ruošša ráji Barentsábis, muitala Kråkenes.
Stuora potensiála
Statoil bohkanhoavda Jez Averty muitala gávdnosiid leat dehálažžan Statoilii.
– Barentsáhpi lea vel deháleabbo Norgga našuvdnii, go Barentsábis lea stuorimus potensiála gávdnat boahttevaš stuora osiid oljjus, muitala Averty. (©NTB)
