Dán vahkus sámegiel Bamse-bláđđi ávvuda, go dál almmustuvvá 150. nummir bláđis, mii lea guoimmuhan sámegiel mánáid jo badjel čieža jagi. Dan gudnin – ja aiddo fál Sámi álbmotbeaivái – bláđis lea muitalus, mas Bamse boahtá Sápmái ja deaivá stálu.
Kirsi Paltto bargá ABC-Company E-skuvllas ja lea jorgalan ja heivehan bláđi Sámi mánáide 2013 rájes, ja illuda go su niehku – sámegiel Bamse – lea šaddan bissovaš doaibman.
– Ollu mánát vurdet áŋgirit ain ođđa bláđi boahtima, ja soitet vehá dáistalitgo oappáin dahje vieljain, ahte «mun dat galggan ovddemuš beassat lohkat», čaimmiha Kirsi, ja muittaša iežas mánnávuođa. Dalle gárttai lohkat bláđi suomagillii. Easkka go ieš fuomášii ohcat Sámedikkis doarjaga jorgaleapmái, de boahtigođii beakkán govvaráidobláđđi maiddái sámegillii, lohká Paltto preassadieđáhusas.
Giitevaš
– Nu, in livčče dalle jáhkkán ahte muhtun beaivvi vel doalan gieđas 150. nummira sámegiel Bamse-bláđis, Kirsi reaškkiha, gii lea jorgalan badjel 5000 siiddu Bamse-muitalusaid vuosttaš nummira rájes. Son lea hui giitevaš Sámedikki doarjagis, go bláđđi lea mávssolaš mánáide.
Bamse boahtá Sápmái
150. nummira gudnin Bamse-bláđis lea Sámi muitalus, mas Bamse boahtá Sápmái, iežas sámi fuolkki galledit.
– Lea nu hávski. Bamse-bláđis leat ovdal maid leamaš Sámi muitalusat, muhto dál Bamse boahtá vuosttaš háve Sápmái, Johkamohkkái, go su oarpmealis, Birehis, leat bohccot jávkagoahtán, mojohaddá Kirsi Paltto, muhto ii muital mo muitalusas geavvá.
– Dan fertebehtet ieža dieđusge lohkat, son reaškkiha, muhto čájehastá gal bláđi ovdasiiddu, mas stuorra stálu gieđas leat Bamse ja su skihpárat, ja vel Bamse fuolki, Biret, sámi gárvvut vel badjelis.
– Ollugat lohket Bamse-bláđi ruoŧa- ja suomagillii maid, nu ahte lea hui vuogas go sii besset Bamse-bláđi mielde finadit Sámis. Min mánáide maid lea suohtas, go Bamses lea fearán dáppe min guovllus, Kirsi muitala.