Ollu muohta váriin maŋŋel guhkes dálvvi, vuorjašuhttá dáhkádusfitnodaga Tryg Forsikring ja dál ballet sii stuora dulvviin giđđii.
– Mii ávžžuhit suohkaniid ja priváhtaolbmuid ráhkkanit dulvviide mat sáhttet šaddat vearrámus dulvin 23 jahkái, lohká dáhkádusfitnodaga vahátdirektevra Karsten Kristiansen preassadieđáhusas.
Ávžžuhit ráhkkanit
Dáhkádusfitnodat ballá dulvvi seamma stuorisin gártat go dat mii lei geassemánus 1995s, go billisteamit ledje 1,8 millijárdda ruvnno ovddas. Dalle lei maid eanet muohta go dábálaččat, ja čoaska dálkkit biste gitta miessemánu 22.beaivvi rádjái, ja muohta ii báljo suddan.
Go bivaldii, de maid arvigođii. Boađusin šattai hirbmat stuora dulvi ja Nuorta-Norgii ledje stuora váikkuhusat geassemánu vuosttaš vahkkuid.
– Lea stuora várra ahte šaddá stuorát giđđadulvi go dábálaččat stuora jogaid lahka, ja várra stuorru beaivvis beaivái go muohta ii sutta. Danne ávžžuhit báikkálaš gearggusvuođabargiid ja priváhtaolbmuid, ráhkkanahttit doaimmaid mat unnidit dulveváikkuhusaid, lohká Kristiansen.
