Unio ballá ahte šaddá streaikka skuvllain, dearvvašvuođainstitušuvnnain, girjerádjosiin ja eará gieldda bálvalusain miehtá riikka.
Unio čállá preassadieđáhusas ahte sáhttá šaddat streaika miehtá riikka jus ii boađe ovttaoaivilvuohta bálkášiehtadallamiin gaskkal KS ja Unio. Áigemearri lea duorastaga čuovganeapmái, miessemánu 27. beaivvi.
Gielddaide maidda streaika sáhttá čuohcat lea Áltá, Bærum, Bergen, Bådåddjo, Haugesund, Kristiansand, Troanddin, Stavanger, Levanger, Ringsaker, Sunnfjord, Tønsberg ja Ålesund.
– Min ulbmil lea dieđusge gávnnahit čovdosa dán soabadallamis, muhto KS fálaldagaid gaska lei stuoris. Jus šaddá dárbu, de leat min miellahtut gergosat streiket, dadjá Unio gieldda šiehtadallanjođiheaddji, Steffen Handal, preassadieđáhusas.
Álttá gielddas sáhttet earret eará Joganjálmmi, Gakori, Gorravári ja Bossugohpi skuvllat giddejuvvot streaikka geažil. Dasa lassin ruovttubuohccedikšun, psykiatriijabálvalus, buhcciidsiida ja NAV.
Fállet menddo heajos bálkká
Handal muitala preassadieđáhusas ahte lea áigi KS árvvusatná dehálaš ámmátjoavkkuid, namalassii oahpaheddjiid ja buohccidivššáriid.
Son oaivvilda dán jagáš loahpparehket ferte álggahit bálkáloktema bargiide geain lea alla oahppu, ja ahte dat ferte čuovvut boahttevaš tariffarehkegiid.
– Mis ii leat áigi vuordit. Jus gielddat galget sáhttit fállat buoret fálaldagaid mánáide, nuoraide, geavaheddjiide ja pasieanttaide, de ferte ámmátgeasuheapmi buoriduvvot. Okta vuohki lea loktet bálkká. Dan sáhttet bargoaddit dahkat. Mii gáibidit čielga buorideami min miellahtuide, cealká Handal preassadieđáhusas.
