Lulli-Sámi boazodoallit ballet Chronic Wasting Disease sáhttit njoammut bohccuide ja dagahit olles roasu ealáhussii. Dávda lea gávdnon juo ealggas ja gottis sin guovlluin.
Lulli-Sámi boazodoallit ballet Chronic Wasting Disease sáhttit njoammut bohccuide ja dagahit olles roasu ealáhussii. Dávda lea gávdnon juo ealggas ja gottis sin guovlluin.
Šibitdoavttirinstituhtta dieđiha ahte Selbus Lulli-Trøndelágas lea ealggas gávdnon Chronic Wasting Disease njoammudávda. Seamma dávda, lei árat dán jagi juo fuomášuvvon ovtta njiŋŋelas gottis Nordfjella goddeguovllus.
Ballet roasus
Lulli-Sámi boazodoallit ballet dát sáhttá buktit roasu olles sin ealáhussii.
– Dát dávda sáhttá njoammut bohccuide, ja dat livččii stuora heahtin boazoealáhussii jus dávda njoammugoahtá bohccuide, dadjá sámediggeáirras John Kappfjell preassadieđáhusas.
Boahtán Amerihkkás
Dávdda leat fuomášan Davvi-Amerihkás, muhto dutkit eai dieđe sihkkarit movt dávda lea boahtán Eurohpái.
Kriisajoavku man Biebmobearráigeahčču, Birasdirektoráhtta ja Šibitdoavttirinstituhtta leat ásahan, leat kárteme man viidát dávda lea juo njommon.
Šibitdoavttirinstituhta dieđuid mielde ii gávdno dál makkárge praktihkalaš iskanreaidu mainna fuomášivččii dávdda ealli elliin.
Gáibida dearvvašvuođaásahusa bohccuide
Kappfjella mielas galggašii ásahit dearvvašvuođabálvalusa sarvvanállái, nugo leat ásahan juo omiide. Dál ii gávdno sullásaš orgána boazodoalu váste.
Sierra dearvvašvuođafálaldat bohccuide ferte su mielas vuoruhuvvot jođáneamos lági mielde.
– Lulli -sámi boazodoallit leat sakka vuorjašuvvan váikkuhusain maid njoammudávda Chronic Wasting Disease sáhttá buktit. Livččii katastrofan olles boazoealáhussii jus njoammu bohccuide. Dál ferte bidjat dárbbašlaš návccaid ja doaimmaid mat bissehit dávdda leavvamis, dadjá John Kappfjell preassadieđáhusas.
