Váhnemat balahit ahte jus sii eai atte mánáide telefuvnna ja lobi geavahit sosiála mediaid, de šaddet olggobeallai. Dát dagaha ahte váhnemat addet mánáide daid ovdal go ledje jurddašan.
– Vai váhnemiin galgá buoret dovdu go mánát leat sosiála mediain, de lea dehálaš ahte leat čielga ráját ja njuolggadusat, muitala Mediabearráigeahčču direktevra Mari Velsand, preassadieđáhusas.
Norgga mánát ožžot telefovnna árabut go goassege ovdal. 17 proseanta mánáin ožžo vuosttaš telefovnna ovdal go devde 7 jagi, nu boahtá ovdan Mediabearráigeahču «Barn og medier 2022» guorahallamis. 93 proseanta mánáin gaskkal 9 ja 11 jagi, lea sierra telefovdna, logi jagi áigi lei 86 proseanta mánáin dán agis sierra telefovdna.
Eatnašat leat sosiála mediain
Smártatelefuvnnat rahpet ođđa máilmmi mánáide, go de leat sosiála mediat olámuttos. Logut «Barn og medier 2022» guorahallamis čájehit ahte eanaš 9–10 jahkásaččat leat sosiála mediain.
– Vaikke váhnemat áddejit ahte sosiála mediain sáhttet sisdoalut mat eai heive mánáide, de goitge luitet sin dohko ovdal devdet 13 jagi. Váhnemat ballet ahte mánát šaddet olggobeallai dahje olgguštuvvojit, jus eai beasa leat oassin sosiála media -máilmmis, muitala Velsand.
Mánát ieža ges muitalit ahte lea somá geahččat telefovnna, muhto ahte sáhttá leat váttis bidjat eret go ovdamearkka dihte galget nohkkat. Mánát maid muitalit ieža ahte lea hástaleaddji álo leahkit olámuttos.
– Muhtin mánát maid muitalit ahte háliidivčče ja dárbbašivčče garraset njuolggadusaid. Muhtimat maid oaivvildedje ahte olu mánát ožžot telefovnna beare árrat, muitala Velsand.
