Roasmmohuhttimat lassánit el-čielčanihkkeliin, ja máŋggas ledje oaivvážis go leat juhkan dahje geavahan eará gárihuhttinávdnasiid.
Dáhkádusfitnodat ballagoahtá dál go juovlabeavdeáigodat lahkona.
– Erenoamážit Oslos oaidnit čielgasit ahte gárihuvvan olbmot roasmmohuvvet el-čiekčansihkkeliiguin. Golggotmánus ledje njealjis geat roasmmohuvve geat ledje oaivvážis. Dál juovlabeavdeáigodagas ballat eanet lihkohisvuođaid dáhpáhuvvamis go gárihuvvan olbmot vulget ruoktot maŋŋel juovlabeavddi gálja luoddaráigge, lohká Tryg dáhkádusa gulahallanráđđeaddi Torbjørn Brandeggen preassadieđáhusas.
Ollugat roasmmohuvvan
Dán jagi lea 661 roasmmohuvvan ja 40:s sis leat bahut roasmmohuvvan.
– El-čiekčansihkkel sáhttá leat várálaš, erenoamážit jus lea gárihuvvan dahje jus vuodjá njalkasis. Mii leat maŋemus áigge registreren ahte olbmot leat iežaset roasmmohuhttán dahje nisttihan vuodjit bisánan biillaid njeaiga, mii fas dagaha máksingáibádusa divvut billistemiid, lohká Brandeggen.
Stuora várra
Dál lea gáibádus ahte lea čuovga sihke ovddabealde ja maŋábealde, muhto ii gáibiduvvo oaivesuodji, biikadeahkka dahje dáhkádus.
– In jáhke ahte dat ollugat geat geavahit čiekčansihkkela dihtet makkár várra lea go ii leat dáhkádus mii gokčá billistemiid dahje roasmmohuvvamiid. Sáhttá gártat divrrasin jus gártá máksigoahtit buhtadusa, lohká Brandeggen.
Ávžžuha
Su ávžžuhus lea ahte buot el-čiekčansihkkeliin leat biikadeahkat, ja ahte eaiggádat jurddašit movt ládde batteriija.
– Leat maid leamaš máŋga dáhpáhusa go el-čiekčansihkkel lea buollán go lea láddeme batteriija. Danne fertet álo atnit dan báikkis gos oainnát dan, ale ge goassege bija el-rávdnjái go leat oađđime. Vaikko lea láddeme go lea olgun dahje siste, de fertet rohttet eret elrávnnjis go lea dievvan elrávdnji, lohká son.
