Oktiibuot 56 ášši leat registrerejuvvon Divttasvuonas dán rádjái, dieđihit Nordlándda politiijat. Politiijat ballet maid ilbmamis eanet áššiid.
Oktiibuot 56 ášši leat registrerejuvvon Divttasvuonas dán rádjái, dieđihit Nordlándda politiijat. Politiijat ballet maid ilbmamis eanet áššiid.
Nordlándda politiijaguovllu politiijaadvokáhtta Jorild Steindal muitala ahte sii dutket dál 25 ođđa rohcošanášši, lassin dan 31 áššái maid leat ovdal almmuhan.
Soitet eanet áššit
Son deattuha ahte eai leat 25 ođđa váidaga, muhto máŋga gillájeaddji muitalit rohcošuvvon máŋgasii.
Dál ballet politiijat ahte sáhttet boahtit vel eanet áššit politiijaide.
– Lea dovddiidus jus leavvá rohcošankultuvra, de dat ii jávkka iešalddis. Lea dehálaš deattuhit ahte mii eat dieđe viidodaga vuos dál, muhto mii ballat ahte rohcošeamit ain dáhpáhuvvet, muitala Steindal NTB:i.
Áddjás bargu
Son muitala ahte lea hirbmat dehálaš olahit sin geat dál sáhttet vásihit rohcošeami.
Nordlándda politiijaguovlu muitala ahte sii barget hehttet ođđa rohcošemiid, lassin doalvut áššiid diggái mat eai leat ollen boarásmuvvat. Kripos lea veahkkin dutkama jođiheamis ja fállet fágaolbmuid geat čađahit dutkama.
– Viidodaga dihte lea áddjás bargu dutkat buot gillájeddjiid ja vihtaniid geain leat čanastagat gillájeddjiide. Mii leat muhtin áššiin ollen dasa ahte fertet eará ládje dutkat ášši, muitala politiijaadvokáhtta.
Son muitala maid ahte politiijat áigot fargga gohččut váidon olbmuid dutkamii. Ii okta ge váidon olmmoš galgga vel leat dutkojuvvon.
Ollu áššit leat boarásmuvvan, ja daid áššiid eai šat dutká viidáset, earret jus dahkki lea ođđaset áššiin dieđihuvvon rohcošeaddjin.
Geassemánus almmuhuvvui
Ášši bođii albmosii geassemánus dán jagi go 11 Divttasvuona dievddut ja nissonat muitaledje VG aviisii iežaset vásáhusaid rohcošeamis. Áššiin lea sáhka mánáid ja rávisolbmuid veagalváldimis, seksualálaš ovttastallan mánáiguin geat leat vuollel 14 jagi boarrásat, ja seksualálaš rohcošeamit mat leat geavvan go lea ávkkástallan iežas virggiin dahje luohttevašvuođa bokte dahkat daguid.
Dán rádjái lea sáhka birrasii 27 gillájeaddji birra, ja 38 rohcošeaddji birra, dieđihit politiijat. Dasa lassin dáidda áššiide, de leat registreren golbma áitinášši ja okta ášši mii lea eastadangeatnegasvuhtii.
Mánáviessu
Eastadanbarggus oassin lea Stáda mánáviessu Bådådjos mannan Divttasvutnii. Stáda mánáviessu bargá mánáiguin geat leat vásihan rohcošeami.
Mánáviesu bargit leat hupman ohppiiguin ja oahpaheddjiiguin Ájluovtta skuvllas, ja leat searvan váhnenčoahkkimiidda masa buot váhnemat ledje bovdejuvvon.
Mánáviesu bargit leat hupman illásteami, seksuála rohcošeami ja buriid ja heajos čiegusvuođaid birra. (©NTB)
