Guovdageaidnulaččat ballet erenoamážit dáruiduhttimis jus Guovdageainnu suohkana ovttastahtto Álttá, Láhpi ja Návuona suohkaniiguin.
Guovdageaidnulaččat ballet erenoamážit dáruiduhttimis jus Guovdageainnu suohkana ovttastahtto Álttá, Láhpi ja Návuona suohkaniiguin.
Nu bođii ovdán álbmotčoahkkimis Guovdageainnus, gosa badjelaš 20 guldaleaddji ledje boahtán gaskavahkku. Fáddán lei suohkanovttastahttin.
Álttá suohkanis lei álbmotčoahkkin disdaga, ja dohko eai lean boahtán nu ollu olbmot go Guovdageainnu čoahkkimii, muitalii logaldalli Geir Are Nyeng.
Šattaše unnitlohkui
Lei PWC advokáhttafitnodat gii ovdanbuvttii guorahallamiid mas bohte earret eará ovdan makkár váikkuhusat ja makkár buorit leat jus bidjet oktii dán njeallje suohkana.
Guovdageainnu suohkanii ii soaitte dat buoremus váikkuhus ovttastuhttit dárogielat suohkaniiguin. Sámegiella ja sámi perspektiiva šaddá unnitlohkui, čilgejuvvui guorahalli bealis.
– Politihkalaččat eai soaitte sámi bellodagat olahit saji dan ođđa suohkanstivrii, go eai soaitte oažžut nu ollu jienaid go dárbbašit vai besset suohkanstivrii. Nu čilgii PWC logaldalli Geir Are Nyeng álbmotčoahkkimis.
Bággonáitaleapmi
– Dat orro bággonáitaleapmi ja dat ii buvtte goasse buori. Lea go ráđđehusa bealis jurddašuvvon sámi suohkaniid bidjat oktii ja daid ráhkadit stuora suohkaniin, jearralii fylkkadiggeáirras ja Guovdageainnu suohkana ássi Klemet K Klemetsen sátnejođiheaddjis.
Sátnejođiheaddji Johan Vasara áigu jearrat dan gažaldaga ráđđehusas ja Sámedikkis.
Stuora seavttit
Suohkanat mat ovttastuvvet ođđa ja stuorát suohkanin, ožžot 65 milliuvnna ruvnno máksot. Dasa lassin oažžu dat ođđa suohkan 12 milliuvnna lassin 15 jagi ovddos guvlui. Oktiibuot lassána sisaboahtu 245 milliuvnna ruvnnuin dan ođđa suohkanis, jus ovttastuvvet.
– Dan ođđa suohkanii boahtá ollu eanet ruhta sisa, muitalii Nyeng.
Áigemearri váldit mearrádusa lea geassemánu 2016. Áigemearri guoská buot suohkaniidda geat leat čielggadeame galget go ovttastuvvot nuppiin suohkaniin.
Guokte vejolašvuođa
Sátnejođiheaddji Johan Vasara muitalii čoahkkimis ahte leat ollu bealit mat eai leat čielggaduvvon, earenoamážit sámi bealit.
– Dál biddjo johtui bargu čielggadit sámi beliid. Dan barggus boahtá NORUT leat dehálaš ja gulahallat Kárášjogain nu ahte leat guokte válljenvejolašvuođa ja guokte molssaeavttut, lohka sátnejođiheaddji, ja lasihii:
– Dás ii sáhte vel konklušuvnna váldit, dás lea bargu mii ferte dahkkot.
