-Almmuhus-
OĐĐASATBallet beare unnán muohttaga

Ballet beare unnán muohttaga

-

-

Árktalaš dálvegilvvuid lágideaddjit leat balus ahte dassážii go álget gilvvut, de muohta suddá oalát. Daid beivviid Nuukas Ruonáeatnamis lea bivvalis dálki.

Kalaallit Nunaata Radioa (KNR) dieđiha ahte Nuukas Ruonáeatnamis maŋimuš beivviid lea leamaš bivvalis dálki. Dát suorggaha Árktalaš dálvegilvvuid (Arctic Winter Games) lágideddjiid. Ovddit beaivvi olgotemperatuvra Nuukas lei 11 ceahki lieggasit go dábálaččat. Čuoiganláhtus lea unnán muohta. Dát muohta mii lea, lea suddame.

 

Árktalaš dálvegilvvuid prográmmas leat oktiibuot 15 valáštallansuorggi, čieža galget lágiduvvot olgun.

– Mii váillahit muohttaga dieđusge, muhto doaivut ahte muohttá vel ovdal go gilvvut álget Nuukas giđđat, muitala Árktalaš dálvegilvvuid nubbijođiheaddji Arnakkuluk Jo Kleist KNR:i.

 

Lágideaddjit eai árvvoštala unnán muohttaga geažil sirdit dan čieža valáštallansuorggi eará báikái.

– Ii, dáid eat pláne lágidit eará báikkiin. Árktalaš dálvegilvvut galget leat Nuukas, lohká Arnakkuluk Jo Kleist.

 

Sámi riikajoavku lea dieđihuvvon earret eará čuoigamiidda ja spábbačiekčamiidda. Gilvvut lágiduvvojit njukčamánu 6. – 11. beivviid dán jagi.

 

 

 

 

-Almmuhus-