Dán jagi sáhttet Norgga geainnuid ala lassánit lagabui 100 000 el-biilla. NAF oaivvilda lea dárbu hoahpuhit barggu ásahit eambbo láddenbáikkiid.
Dássážii dán jagi leat Norgga geainnuid ala lassánan 29 000 el-biilla ja lohku dáida vel lassánit. Dat mearkkaša ahte measta juohke nubbi ođđa biila Norggas lea dál el-biila.
– Dál go el-biillat lassánit, de sáhttet šaddat hirbmat ráiddut láddenbáikkiin, lohká NAF gulahallanráđđeaddi, Nils Sødal preassadieđáhusas.
NAF oaivvilda ahte lea dárbu ásahit olu eanet láddenbáikkiid Norgii, ja Sødal lohká ge ahte dál lea hoahppu viiddidit láddenfierpmádaga go leat eanet ja eanet geat ostet el-biillaid.
