Biebmobearráigeahčus leat čielga gildosat álbmogii amas loddeinflueansa njoammut viidát.
Maŋimuš áigge leat gávdnon olu jápmán meahccelottit main leamaš loddeinflueansa. Leat gávdnon Rogalánddas Finnmárkui. Loddeinflueansa hárve njoammu lottis olbmui, muhto sihkarvuođa dihte ávžžuha Biebmobearráigeahčču čuovvut gorrenjuolggadusaid.
– Mii bivdit buohkaid diktit buohcci dahje jápmán lottiid orrut. Állet guoskka daidda. Állet váldde buohcci lotti ruoktot ja daid dikšut dahje biebmat, dadjá Biebmobearráigeahču eallidearvvašvuođa ossodathoavda Anne Marie Jahr preassadieđáhusas.
Jus gávnnat buohcci dahje jápmán lottiid, de bivdá Biebmobearráigeahčču sidjiide dieđihit e-poastta dahje telefovnna bokte, nu ahte besset árvvoštallat maid dahket. Jus leat leamaš buohcci dahje jápmán lotti lahka ja vásihat influeanssa dávdamearkkaid, de galggašit váldit oktavuođa fástadoaktáriin.
Sihke Biebmobearráigeahčču ja Álbmotdearvvašvuođainstituhta čuvvot dilálašvuođa.
Lottiid biebman
Biebmobearráigeahčču gieldá biebmamis lottiid párkkain ja jávregáttiin. Dat sáhttá mielddisbuktit ahte lottit čoahkkanit smávva guovlluide ja dávda njoammu álkit.
Jáhkkimis ođđa dábálaš dilli
Loddeinflueansa meahccelottiin lea jáhkkimis ođđa dábálaš dilli Norggas. Virus lea guhkit áiggi gávdnon Guovddáš-Eurohpás, ja dál lea leavvan Norgii. Dat dagaha ahte fertet váruhit.
– Mii jáhkkit ahte min luhtte leat meahccelottiin njommon dál guhkit áigge, dadjá Jahr preassadieđáhusas.
