Dušše 43 proseantta norgalaččain dadjet ahte attáše vuosttašheahteveahki jus lihkohisvuohta deaividivččii.
Dan botta go juohke njealját norgalaš vástida ahte attášii vuosttašheahteveahki beroškeahttá mii lea dáhpáhuvvan olbmuin, de dadjá 32 proseantta ahte veahkehivčče dihto dáhpáhusaid maŋŋel.
22 proseantta fas vástida ahte eai dieđe duosttaše go addit vuosttašheahteveahki ja guokte proseantta fas oaivvildit ahte eai oba ge duosttaše veahkehit heahtedilis.
Nu boahtá ovdan Rukses Ruossa guorahallamis mas Respons Analyse lea jearahallan 1199 oasseváldi.
Ballet
Olbmot, geat eai duostta dahje eahpidit duostamis addit vuosttašheahteveahki, dadjet ahte leat eahpesihkkarat, ahte ballet boastut addimis veahki ja ahte vearáskahttet bártahuvvan olbmo dili.
Rukses Ruossa dadjá ahte olbmos lea golmma-njealje gearddi stuorát vejolašvuohta ceavzit jus ožžot heahteveahki ruovttus maŋŋel go váibmu bisána. Golbma álgominuhta leat oainnat vearrámusat jus dasa fáhtehallá.
– It don sáhte bargat maidege boastut. Jus váibmobuohcci ii oaččo veahki dakkaviđe, de sáhttá jápmit. Dávjá maid earát bohtet álkibut veahkkin, jus oidnet ahte leat reageren go nubbi lea buohccán, dadjá Rukses Ruossa Anders Thorheim NRK:i.
Juohke jagi buohccájit birrasii 3000 olbmo fáhkkestaga váibmovigiiguin.
(©NTB)
