Árjja sámediggejoavku oaivvilda ahte galggašii ásahuvvot sámi bivdokursa ja ovddida ášši sámedikkis.
Árjja sámediggejoavku oaivvilda ahte galggašii ásahuvvot sámi bivdokursa ja ovddida ášši sámedikkis.
Sámediggelahttu Árjjas Inger Eline Eriksen lohka váttisvuohtan otná bivdokurssain go sámi bivdoárbevierut eai leat mielde.
Háliida rievdadit bivdokurssa
Eriksen gii ieš lea aitto čađahan bivdokurssa, lohká preassadieđáhusa bokte sutnje amas áššin gullat goddebivddu ja duvvábivddu birra mii dáhpáhuvvá lulli-Norggas. Eriksen ii áiggo dohkkehit go bivdokurssas ii leat sámi perspektiiva.
– Balan ahte sámi bivdovuogit, meahcásteapmi ja bivdosánit jávket jus otná bivdokursa ii rievdaduvvo. Mii fertet maid sihkarastit ahte boahtteáiggi sámi bivdit máhttet sámi loddenamaid ja elliid namahusaid, oaivvilda Eriksen.
Sámi bivdoperspektiivan
Árja dáhttu Sámediggeráđi gulahallat Birasgáhttendirektoráhtain geain lea fágalaš ovddasvástádus bivdokurssain, ja gáibidit sámi perspektiiva váldot mielde bivdokurssain ja ráhkadit vel sámi oahpponeavvuid dása.
– Lea dehálaš ahte Sámediggeráđđi váldá mielde sámiid geain lea gelbbolašvuohta sámi bivdovugiin ja meahcásteamis go bargagohtet dán barggu, loahpaha Árjja Inger Eline Eriksen.
