Finnmárkku Fágalihtu jođiheaddji Bjørg Tapio lohká Fágalihttu ballá ahte ráđđehusa áigumuš heaittihit buot gielddalaš vearrogeassinkantuvrraid sáhttá dagahit ahte lassána mávssekeahtes vearru maiddái Norggas.
Dálá ráđđehus evttoha 2020 bušeahtas heaittihit buot dálá gielddalaš vearrogeassinkantuvrraid ja bidjat buot daid Vearroetáhtii, dieđiha Finnmárkku Fágalihtu guovllujođiheaddji Bjørg Tapio preassadieđáhusas.
Finnmárkku Fágalihttu oaivila mielde dát nuppástuhttin čuohcá garrasit gielddaide ja ássiide.
Báikkálaš vearrogessiid dehálaš báikkálaš máhttu ja lagašvuohta fitnodagaide jávká vearrokantuvrraid heaittihemiin.
Dálá vearrogáibideapmi sihkkarastá lagaš gulahallama vearromáksi ja vearrogeassi gaskka. Ráđđehusa «heaittihanevttohusain» masset gielddat dehálaš deaivvadanbáikki ássiide ja báikkálaš ealáhussii.
Fágalihtus leat 400 miellahtu geaidda evttohus njuolgga čuohcá ja Finnmárkku Fágalihttu lea vuorjašuvvan go dat áitá miellahtuid bargosajiid ja ássiid bálvalusaid.
Finnmárkku Fágalihttu ii leat ovttaoaivilis ahte lea gánnáhahtti guovdilastit dálá vearrokantuvrra ortnega. Jus buohtastahttit Dánmárkkuin, mii guovdilasttii vearrogeassima 2005:s mas lei 50.1 miljárdda mávssekeahtes vearru, lea dat supmi lassánan jagis jahkái.
Danmárkku riikarevišuvdna almmuhii 2017:s raportta «Rigsrevisjonens beretning om revisionen af statsregnskabet for 2017».
Das cuiggodii riikarevišuvdna dan ođđa vearrogeassinortnega garrasit. Raporttas čájehuvvui ahte mávssekeahtes almmolaš vearru lassánii gitta birrasii 108.6 miljárdii 2017:i.
– Finnmárkku Fágalihttu oaivvilda ahte lea stuorra riska ahte mávssekeahtes vearru Norggas lassána jus ráđđehus oažžu dohkkehuvvot heaittihit gielddalaš vearrogeassinkantuvrraid. Fágalihttu ii leat mielas duvdit álbmogii dakkár riskka, deattuha Finnmárkku Fágalihtu guovllujođiheaddji Bjørg Tapio.
