-Almmuhus-
-Almmuhus-
-Almmuhus-
OĐĐASATBallá čieža buori jagis

Ballá čieža buori jagis

-

-

Miessás jahki ii leat dušše lihkkojahki, muhto maiddái vahátjahki, oaivvilda Ábborášša boazodoalli.

– Dajan nu go boares sápmelaš, amma hal dál bohtet čieža buori jagi. Balan ahte sáhttá doallat deaivása, dadjá Ábborášša boazodoalli Isak Mathis Triumf.

Ievttá Ávviris čállui Fiettara orohaga birra gos vásihit erenomáš buori ja miessás jagi. Fiettara jođiheaddji Mikkel Nils M. Sara ii loga ná miessás jahkin sis leamaš 2009 rájes ja illuda. Buorren jahkin son maid dál jáhkká šaddat gávpeealáhusaide go lea eanet maid bidjet gávpái.

 

Ábborášša Isak Mahtis Triumf ii loga sin bealis mihkkege erenomáš miessás jagi dán jagi, muhto son vuohttá ahte olusiin leat nu. Dál son váruha dán lihku. Son atná heajos sáhkan go oaivvilda boazodili rašes dilis. Sii leat garra deattus earret eará go leat olu sisabahkkemat, garra gáibádusat, ja stáhta vel gáibida ahte galget unnidit ealu.

 – Stádas leat njuovvangáibádusat boahtán, leat bággonjuovvamat njulgestaga, dadjá Triumf ja joatká muitaleames ahte miessás jahki mearkkaša ahte eallu stuorru fas.

 

Einnostit mo šaddá

Vaikke Triumf ballá miessejagi šaddat hástalussan, de son dattetge ii duostta áibbas sihkkarit einnostit iežas ságaid šaddat duohtan.

 – Lea váttis einnostit mo šaddá, go eat goassege dieđe maid stáhta fuobmá. Fertet oaidnit mii de geavvá ovddasguvlui, dadjá Triumf. Son lea oalle sihkar ahte lea buorre dát jahki go diibmá lei lossa jahki.

 

Logut seamma dásis

Finnmark Rein njuovahaga beaivválaš jođiheaddji Are Smuk Figved oaivvilda ahte lea buorre sáhka go muhtun orohagain lea miessás jahki dán jagi, muhto ii loga mearkkašit dán njuovahahkii nu erenomážit. Son muitala lea nu ahte muhtun jagiid leat oarjjabeale orohagain rivttes buorre jahki, dan botta nuorttabeale orohagain heajos jahki, ja eará jagiid fas nuppe ládje.

 – Min logut leamaš seamma dásis maŋimuš logi jagi. Muhtun jagit leat buorit oarjjabealde ja muhtun jagiid fas nuorttabealde, dadjá Smuk Figved.

-Almmuhus-