Ođđa raporta čájeha ahte lea stuorra várra ahte amas sáivaguollenálit levvet davvijávrriide.
Finnmárkku máttaosiin lea várra ahte amas sáivaguollenálit levvet čázádagaide gosa eai gula. Vuosttažettiin lea sáhka guollenáliin nu go hávggas ja rávddus, mat loktet bures galbma čázis.
Ođđa dutkanraportta lea Norgga Luonddudutkaninstituhtta (NINA) ráhkadan Birasdirektoráhttii. Raporta čájeha gos lea stuorra sáivaguoli leavvanriska ja dan sii sáhttet einnostit 50 jagi ovddasguvlui.
Deháleamos doaibma ekovuogádahkii lea hehttet ahte amas sáivaguollenálit leavvagohtet, ja jus vuos sajálduvvet, de lea daid váttis jávkadit. Leat čadnon stuorra resurssat jávkadit amas guollenáliid.
– Lea dehálaš birashálddašeapmái ahte sáhttá árvvoštallat gos lea stuorra várra ahte amas nálit leat leavvagoahtán, dadjá birasdirektevra Ellen Hambro.
Dálkkadatrievdamat hástalit
Maŋimuš 50 jagis lea registrerejuvvon masá 3000 dáhpáhusa ahte leat introduserejuvvon amas sáivaguollenálit iešguđetge čázádagain Norggas. Go vissis nálli sajálduvvá ođđa birrasii, de sáhttá dat rievdadit ekovuogádaga ja gáržžidit dan guovllu luondduvaljivuođa. Amas nálit sáhttet maiddái buktit dávddaid náliide mat leat dan guovllus.
– Lea jáhkkimis ahte amas guollenálit levvet lea stuorát dan sivas go tempratuvra loktana dálkkádatrievdamiid geažil, dadjá Hambro.
