-Almmuhus-
KULTUVRA– Bálkkašupmi speadjalastá sin čehppodaga

– Bálkkašupmi speadjalastá sin čehppodaga

-

-

Beaivváš Sámi Našunálateáhter lea ožžon Norgga teáhterárvvoštalliid bálkkašumi, dát dieđusge movttiidahttá sin bargat viidáset. 

Beaivváš Sámi Našunálateáhter vuittii «Vidas Extremas» čájálmasain Norgga teáhterárvvoštalliid bálkkašumi.

Bálkkašumis lea alla árvu Norgga teáhterbirrasis.

– Lea stuora gudni oažžut bálkkašumi. Bálkkašumis lea stuora árvu sámi dáidagii. Odne, ja buot eará beivviid lea hirbmat mávssolaš leat Sámi teáhterhoavdan. Mun nu čevllohalan, lea nu suohtas go oaččuimet bálkkašumi, lohká Beaivváš teáhterhoavda Rolf Degerlund. 

 

Bággu duohtandahkat teáhterviesu
Beaivváš lea lihkostuvvan bures «Vidas Extremas» teáhterčájálmasain. Mannan geasi ožžo maiddái Norgga stuorámus teáhterbálkkašumi, nammalassii Heddabálkkašumi.

Teáhterhoavda doaivu ahte bálkkašumit leat buorit ákkastallamat hukset teáhterviesu Guovdageidnui. 

– Dál gal fertejit hukset teáhterviesu. Mii eat sáhte šat bargat heajos visttis mii lea dego návet, lohká Degerlund.

 

Dušše álgu
Vaikke váilevaš teáhterviessu vuorjašuhttá teáhterhoavdda maiddái stuora illubeaivvi, de dadjá son ahte sis lea čuvges boahtte áigi. 

– Bálkkašumit čalmmustahttet Beaivváža ja movttiidahttet min bargat viidáset. Dii lehpet dál dušše álggu oaidnán. Bálkkašumit oainnat duođaštit ahte mis lea alla dássi, mii leat oadjebasa, duostilat ja čeahpit iežamet barggus, lohká Degerlund. 

 

Ánssáša rámi
«Vidas Extremas» čájálmas lea Beaivváš Sámi Našunálateáhtera ja Hætta Productions ovttasbargoprošeakta. 

– Olmmoš ii baljo jáhke ahte lea searvan ná dehálaš ovttasbargui, lea hirbmat somá go vuittiimet bálkkašumi. Mun sávan ahte Beaivváža fuomášit olggobealde Sámi dál, ahte oidnen man erenomáš ja profeššunealla čájálmasaid sii buvttadit. Beaivváš oažžu dál dan rámi man ánssáša, lohká Christina Hætta.

 

Háliida bargat eambbo álgoálbmotčájálmasaiguin  
«Vidas Extremas» čájálmasas gávnnadeaba guokte áibbas guovttelágan máilmmi, Guatemala ja Sápmi. Teáhterbihttá čalmmustahttá mayaálbmoga hástalusaid dáiddalaččat.

Hætta mielas lei mávssolaš bargat čájálmasain, ja áinnas bisošii teáhtermáilmmis. 

– Teáhterbihttás lea dehálaš fáddá, ja lei suohtas ovttasbargat min mayaoappáiguin ja vieljaiguin. Livččii somá eambbo geahčadit álgoálbmogiid erohusaid ja seammaláganvuođaid. Mis han lea oktasaš historjá ja hástalusat, dadjá Hætta. 


Beaivváš Sámi Našunálateáhter lea dán jagi jo ožžon Heddabálkkašumi Vidda Extremas čájálmasa ovddas. Vuorkágovva: Eivor Eriksen

 

-Almmuhus-